തിരുവനന്തപുരം : സംസ്‌ഥാനത്ത് ഉടൻ നടക്കാൻ പോകുന്ന നിയമസഭാ തിരഞ്ഞെടുപ്പിന്റെ മുന്നൊരുക്കങ്ങൾ വിലയിരുത്തുന്നതിനായി കേന്ദ്ര തിരഞ്ഞെടുപ്പ് കമ്മീഷൻ ഇന്ന് കേരളത്തിലെത്തും. ഇന്ന് രാത്രിയോടെ കേരളം സന്ദർശിക്കാനായി എത്തുന്ന കേന്ദ്ര തിരഞ്ഞെടുപ്പ് സംഘം ഈ മാസം 15ആം തീയതി വരെ കേരളത്തിൽ ഉണ്ടാകുമെന്നും അധികൃതർ അറിയിച്ചു. മുഖ്യ തിരഞ്ഞെടുപ്പ് കമ്മിഷണർ സുനിൽ അറോറ, തിരഞ്ഞെടുപ്പ് കമ്മിഷണർമാരായ സുശീൽ ചന്ദ്ര, രാജീവ് കുമാർ എന്നിവരും മുതിർന്ന ഉദ്യോഗസ്‌ഥരുമാണ് കേരളത്തിൽ എത്തുന്ന സംഘത്തിൽ ഉണ്ടാവുകയെന്ന് മുഖ്യ തിരഞ്ഞെടുപ്പ് കമ്മീഷണർ ടീക്കാറാം മീണ വ്യക്‌തമാക്കി.
ഇന്ന് കേരളത്തിൽ എത്തുന്ന സംഘം നാളെ രാവിലെ 10 മണിയോടെ മുഖ്യ തിരഞ്ഞെടുപ്പ് ഓഫീസറുമായും പോലീസ് നോഡൽ ഓഫിസറുമായും കൂടിക്കാഴ്‌ച നടത്തും. അതിന് ശേഷം 11 മണിയോടെ രാഷ്‌ട്രീയകക്ഷി പ്രതിനിധികളുമായും, ഉച്ചക്ക് ശേഷം 3.30ന് ജില്ലാ തിരഞ്ഞെടുപ്പ് ഓഫീസർമാരുമായും എസ്‍പിമാരുമായും ചർച്ച നടത്തും. ശേഷം വൈകുന്നേരം 6.30ന് തിരഞ്ഞെടുപ്പുമായി ബന്ധപ്പെട്ട മറ്റു കാര്യനിർവഹണ ഏജൻസികളുമായി ആശയവിനിമയമുണ്ടാവും.
നാളെ നടക്കുന്ന ചർച്ചകൾക്ക് ശേഷം 14ആം തീയതി രാവിലെ 10ന് വീണ്ടും മുഖ്യ തിരഞ്ഞെടുപ്പ് ഓഫീസറുമായി ചർച്ച നടക്കും. വൈകിട്ട് 3.30ന് ചീഫ് സെക്രട്ടറി, ആഭ്യന്തസെക്രട്ടറി, സംസ്‌ഥാന പോലീസ് മേധാവി തുടങ്ങിയ മുതിർന്ന ഉദ്യോഗസ്‌ഥരുമായി ആശയവിനിമയം നടത്തും. ശേഷം വൈകുന്നേരം 5 മണിയോടെ വാർത്താ സമ്മേളനവും സംഘടിപ്പിക്കും.
Read also : കോൺഗ്രസ് നിയമസഭാ അങ്കത്തട്ടിലേക്ക്; പ്രാഥമിക യോഗം കൊച്ചിയിൽ ആരംഭിച്ചു
