റിയാദ്: സൗദിയിലെ മസ്ജിദുകളില് ഉച്ചഭാഷിണി ഉപയോഗത്തിന് നിയന്ത്രണം. ബാങ്ക് വിളിക്കുന്നതിനും ഇഖാമത്തിനും മാത്രമായി ഉച്ചഭാഷിണി പരിമിതപ്പെടുത്താനാണ് നിര്ദ്ദേശം. നമസ്കാര വേളയില് പുറത്തേക്കുള്ള ഉച്ചഭാഷിണി പാടില്ലെന്നും, ഉച്ചഭാഷിണി ഉപയോഗിക്കുമ്പോള് ശബ്ദം കുറക്കണമെന്നും ഇസ്ലാമിക മന്ത്രാലയം നിര്ദ്ദേശിച്ചു.
ഇത് സംബന്ധിച്ച് ജീവനക്കാരെ വിവരമറിയിക്കാന് വിവിധ മേഖലകളില് പ്രവര്ത്തിക്കുന്ന മതകാര്യ ഓഫീസുകള്ക്ക് മതകാര്യ വകുപ്പ് മന്ത്രി ഡോ. അബ്ദുല് ലത്തീഫ് ആലുഷൈഖ് നിര്ദ്ദേശം നല്കി. ശബ്ദം ഉപകരണത്തിന്റെ പരിധിയുടെ മൂന്നിലൊന്നില് കവിയരുതെന്നും, പുതിയ തീരുമാനം ലംഘിക്കുന്നവര്ക്ക് എതിരെ നിയമനടപടി സ്വീകരിക്കണമെന്നും മന്ത്രി നിര്ദ്ദേശിച്ചു.
ചില ആരാധനാലയങ്ങളില് നമസ്കാര വേളയില് പുറത്തേക്കുള്ള ഉച്ചഭാഷിണികള് ഉപയോഗിക്കുന്നതായും, ഇത് പരിസരത്തെ വീടുകളിലും മറ്റ് താമസ കേന്ദ്രങ്ങളിലും കഴിയുന്ന പ്രായമായവര്ക്കും, കുട്ടികള്ക്കും, രോഗികള്ക്കും ബുദ്ധിമുട്ട് ഉണ്ടാക്കുന്നതായി ശ്രദ്ധയില്പ്പെട്ടതിനെ തുടര്ന്നാണ് മന്ത്രാലയത്തിന്റെ പുതിയ തീരുമാനം.
