കോട്ടയം : നിയമസഭാ തിരഞ്ഞെടുപ്പിൽ ഉമ്മൻ ചാണ്ടി പുതുപ്പള്ളി മണ്ഡലം വിടരുതെന്ന ആവശ്യം ഉന്നയിച്ച് യൂത്ത് കോൺഗ്രസ് പ്രവർത്തകൻ ആത്‍മഹത്യ ഭീഷണി മുഴക്കി. ഉമ്മൻ ചാണ്ടിയുടെ വീടിന് മുകളിൽ കയറിയാണ് പ്രവർത്തകൻ ആത്‍മഹത്യ ഭീഷണി മുഴക്കിയത്. തുടർന്ന് ഉമ്മൻ ചാണ്ടി തന്നെ നേരിട്ടെത്തി അനുനയിപ്പിച്ചതോടെയാണ് പ്രവർത്തകൻ താഴെ ഇറങ്ങിയത്. ജസ്‌റ്റിൻ എന്ന യൂത്ത് കോൺഗ്രസ് പ്രവർത്തകനാണ് ഉമ്മൻ ചാണ്ടി പുതുപ്പള്ളി വിടരുതെന്ന ആവശ്യമുന്നയിച്ച് ആത്‍മഹത്യ ഭീഷണിയുമായി രംഗത്ത് വന്നത്.
ദേശീയ നേതൃത്വവുമായുള്ള കൂടിക്കാഴ്‌ചക്ക് പിന്നാലെ പുതുപ്പള്ളിയിലെ വീട്ടിൽ ഉമ്മൻ ചാണ്ടി എത്തിയതിന് പിന്നാലെയാണ് ആത്‍മഹത്യ ഭീഷണി മുഴക്കി ജസ്‌റ്റിൻ വീടിന് മുകളിൽ കയറിയത്. നിയമസഭാ തിരഞ്ഞെടുപ്പിൽ നേമത്തേക്ക് ഉമ്മൻ ചാണ്ടിയെ മൽസരിപ്പിക്കാൻ നേതൃത്വം ശ്രമം തുടരുന്നതിനിടയിലാണ്, പുതുപ്പള്ളി വിടരുതെന്ന ആവശ്യവുമായി പ്രവർത്തകൻ ആത്‍മഹത്യ ഭീഷണി മുഴക്കിയത്. തുടർന്ന് പ്രവർത്തകർക്കൊപ്പം വീടിന് വെളിയിൽ എത്തിയ ഉമ്മൻ ചാണ്ടി ജസ്‌റ്റിനെ ഫോണിൽ വിളിച്ച് താഴെയിറങ്ങാൻ ആവശ്യപ്പെടുകയായിരുന്നു.
ഉമ്മൻ ചാണ്ടി ആവശ്യപ്പെട്ടതിന് പിന്നാലെയാണ് പ്രവർത്തകൻ താഴെ ഇറങ്ങാൻ തയ്യാറായത്. ഉമ്മൻചാണ്ടി പുതുപ്പള്ളി വിട്ടാൽ പിന്നെ തങ്ങൾ ജീവിച്ചിരുന്നിട്ട് കാര്യമുണ്ടോ എന്ന് ജസ്‌റ്റിൻ മാദ്ധ്യമങ്ങളോട് പ്രതികരിച്ചു. ഹൈക്കമാൻഡോ, സോണിയ ഗാന്ധിയോ രാഹുലോ ആര് പറഞ്ഞാലും തങ്ങൾ ഉമ്മൻ ചാണ്ടിയെ വിട്ടു നൽകില്ലെന്നും ജസ്‌റ്റിൻ പറഞ്ഞു.
Read also : ചികിൽസയിൽ കഴിഞ്ഞിരുന്ന വ്യാപാരി ആശുപത്രിയിൽ തൂങ്ങി മരിച്ചു
