ന്യൂഡെല്‍ഹി: ഇന്ത്യയിലെ വലിയ സംസ്‌ഥാനങ്ങളിലെ മികച്ച ഭരണമുള്ള സംസ്‌ഥാനമെന്ന പദവി കേരളം സ്വന്തമാക്കിയതില്‍ അഭിനന്ദിച്ച് പ്രശാന്ത് ഭൂഷണ്‍. മോശം ഭരണമുള്ള സംസ്‌ഥാനമായ ഉത്തര്‍പ്രദേശിനെ പരിഹസിക്കുകയും ചെയ്‌തു. കേരളത്തെ രാമരാജ്യത്തോടും ഉത്തർപ്രദേശിനെ യമരാജ്യത്തോടും ഉപമിച്ചാണ് പ്രശാന്ത് ഭൂഷന്റെ ട്വീറ്റ്. ഐഎസ്ആര്‍ഒ മുന്‍ മേധാവി ഡോ. കസ്‌തൂരി രംഗന്‍ അധ്യക്ഷനായ പബ്ളിക് അഫയേഴ്സ് സെന്റര്‍ തയ്യാറാക്കിയ റിപ്പോര്‍ട്ട് പ്രകാരമാണ് ഇന്ത്യയിലെ വലിയ സംസ്‌ഥാനങ്ങളിലെ മികച്ച ഭരണമുള്ള സംസ്‌ഥാനമെന്ന പദവി കേരളം സ്വന്തമാക്കിയത്. രണ്ടാം സ്‌ഥാനം തമിഴ്‌നാടിനാണ്. ഏറ്റവും മോശം ഭരണമുള്ള സംസ്‌ഥാനം ഉത്തര്‍പ്രദേശ് ആണ്. ചെറിയ സംസ്‌ഥാനങ്ങളില്‍ ഗോവയാണ് ഒന്നാം സ്‌ഥാനത്ത്.
Kerala best-governed, Uttar Pradesh worst among large states, says Public Affairs Centre report.
Ram Raj Vs Yum Raj! https://t.co/ec3JLM17hm— Prashant Bhushan (@pbhushan1) October 31, 2020
ന്യൂഡെല്‍ഹി ആസ്‌ഥാനമായി പ്രവര്‍ത്തിക്കുന്ന നോണ്‍ പ്രോഫിറ്റ് സംഘടനയായ പബ്ളിക് അഫയേഴ്സ് സെന്റര്‍ (പിഎസി) പുറത്തിറക്കിയ പബ്ളിക് അഫയേഴ്സ് ഇന്‍ഡക്‌സ് വാര്‍ഷിക റിപ്പോര്‍ട്ടിലാണ് രാജ്യത്തെ വിവിധ സംസ്‌ഥാനങ്ങളിലെ ഭരണത്തെ വിലയിരുത്തിയത്. സുസ്‌ഥിര വികസനം തുടങ്ങി വിവിധ മാനദണ്ഡങ്ങളില്‍ സംസ്‌ഥാനങ്ങളുടെ പ്രകടനം പരിഗണിച്ചാണ് പട്ടിക തയ്യാറാക്കിയത്.
കേരളം (1.388 പിഎഐ ഇൻഡക്‌സ് പോയിന്റ്), തമിഴ്‌നാട് (0.912), ആന്ധ്രാപ്രദേശ് (0.531), കര്‍ണാടക (0.468) എന്നിങ്ങനെയാണ് പോയിന്റ്. ഉത്തര്‍പ്രദേശ്, ഒഡീഷ, ബീഹാര്‍ എന്നിവയാണ് ഈ വിഭാഗത്തില്‍ ഏറ്റവും പിറകില്‍. ചെറിയ സംസ്‌ഥാന വിഭാഗത്തില്‍ 1.745 പോയിന്റുമായി ഗോവ ഒന്നാം സ്‌ഥാനത്തും മേഘാലയ (0.797), ഹിമാചല്‍ പ്രദേശ് (0.725) എന്നിവ രണ്ടും മൂന്നും സ്‌ഥാനങ്ങളിലുമെത്തി.
Read also: ഇന്ത്യയില്‍ മികച്ച ഭരണമുള്ള സംസ്‌ഥാനം കേരളം
