നാളെ നടക്കേണ്ട പരീക്ഷ ഇന്ന് വൈകീട്ട് റദ്ദാക്കി പിഎസ്‌സി; വലഞ്ഞ് ഉദ്യോഗാർഥികൾ
പരീക്ഷയുടെ യോഗ്യതയിൽ മാറ്റം വരുത്തിയതായി ഇന്ന് ചേർന്ന കമ്മീഷൻ യോഗത്തെ സർക്കാർ അറിയിച്ചതിനെ തുടർന്നാണു പരീക്ഷ മാറ്റിവയ്‌ക്കേണ്ടി വന്നതെന്നാണ് പിഎസ്‌സിയുടെ വിശദീകരണം.
തിരുവനന്തപുരം: നാളെ നടക്കേണ്ട പരീക്ഷ ഇന്ന് വൈകീട്ട് റദ്ദാക്കി പിഎസ്‌സി. നാളെ നടത്താൻ നിശ്‌ചയിച്ച മൈക്രോബയോളജി അസി. പ്രഫസർ പരീക്ഷയാണ് ഇന്ന് വൈകീട്ട് അഞ്ചുമണിക്ക് റദ്ദാക്കിയത്. ഇതോടെ പരീക്ഷ എഴുതാൻ തലേന്ന് തന്നെ വിവിധയിടങ്ങളിൽ എത്തിയ നിരവധി പേരാണ് കുടുങ്ങിയത്.
അവസാന നിമിഷം പരീക്ഷ റദ്ദാക്കിയതിനെതിരെ ഉദ്യോഗാർഥികൾ രംഗത്തെത്തി. കൊച്ചിയിൽ ഉള്ള നിരവധി പേർക്ക് പരീക്ഷാ കേന്ദ്രം അനുവദിച്ചത് കോഴിക്കോട്ടാണ്. ജോലി ചെയ്യുന്ന സ്‌ഥാപനങ്ങളിൽ നിന്ന് ലീവെടുത്ത് സ്‌ത്രീകൾ ഉൾപ്പടെയുള്ള നിരവധി പേർ ഇന്ന് കോഴിക്കോട് എത്തിയിരുന്നു.
വൈകീട്ട് അഞ്ചുമണിക്ക് ശേഷമാണ് ഇവർക്ക് ലോഗിൻ ചെയ്‌ത്‌ പരിശോധിക്കാൻ സന്ദേശം കിട്ടിയത്. തുടർന്നാണ് പരീക്ഷ മാറ്റിവെച്ചെന്നും പുതിയ തീയതി പിന്നീട് പ്രഖ്യാപിക്കുമെന്നുള്ള അറിയിപ്പ് ലഭിച്ചത്. അവസാന നിമിഷം പരീക്ഷ മാറ്റിയതോടെ മടക്കയാത്രയ്‌ക്ക് ടിക്കറ്റ് കിട്ടാത്തതിനാൽ ഇന്ന് കോഴിക്കോട് തങ്ങേണ്ട അവസ്‌ഥയാണ് ഉണ്ടായതെന്ന് ഉദ്യോഗാർഥികൾ പറഞ്ഞു.
വടക്കൻ ജില്ലകളിൽ നിന്ന് തിരുവനന്തപുരത്തേക്ക് ട്രെയിനിൽ വന്നവർ യാത്രയ്‌ക്കിടെ വിവരമറിഞ്ഞ് തിരികെ പോയി. പരീക്ഷയുടെ യോഗ്യതയിൽ മാറ്റം വരുത്തിയതായി ഇന്ന് ചേർന്ന കമ്മീഷൻ യോഗത്തെ സർക്കാർ അറിയിച്ചതിനെ തുടർന്നാണു പരീക്ഷ മാറ്റിവയ്‌ക്കേണ്ടി വന്നതെന്നാണ് പിഎസ്‌സിയുടെ വിശദീകരണം. ഉച്ചയ്‌ക്ക് ശേഷമാണ് ഇക്കാര്യം പരീക്ഷാ കൺട്രോളറെ അറിയിച്ചതും പരീക്ഷ റദ്ദാക്കിയതും.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
