അനിശ്‌ചിതത്വം നീങ്ങി; സംസ്‌ഥാനത്ത്‌ ഇന്ന് മുതൽ ഡ്രൈവിങ് ടെസ്‌റ്റ് പുനരാരംഭിക്കും
സമരം നടന്ന ദിവസങ്ങളിൽ മുടങ്ങിയ ടെസ്‌റ്റുകൾ വേഗത്തിൽ പൂർത്തിയാക്കാനുള്ള നടപടികൾ എടുക്കാൻ ആർടിഒമാർക്ക് നിർദ്ദേശം നൽകിയിട്ടുണ്ട്. രണ്ടേമുക്കാൽ ലക്ഷത്തോളം അപേക്ഷകളാണ് മുടങ്ങിക്കിടക്കുന്നത്.
തിരുവനന്തപുരം: ദിവസങ്ങൾ നീണ്ട അനിശ്‌ചിതത്വത്തിന് ഒടുവിൽ സംസ്‌ഥാനത്ത്‌ ഇന്ന് മുതൽ ഡ്രൈവിങ് ടെസ്‌റ്റ് പൂർണതോതിൽ പുനഃസ്‌ഥാപിക്കും. ടെസ്‌റ്റ് പരിഷ്‌ക്കരണത്തിനെതിരെ സംസ്‌ഥാനത്തെ ഡ്രൈവിങ് സ്‌കൂൾ ഉടമകളുടെ സംയുക്‌ത സമിതി നടത്തിവന്ന സമരം അവസാനിച്ചതോടെയാണ് ടെസ്‌റ്റുകൾ വീണ്ടും പുനരാരംഭിക്കുന്നത്.
സമരസമിതി ഉന്നയിച്ച ആവശ്യങ്ങൾക്ക് ഗതാഗതമന്ത്രി കെബി ഗണേഷ് കുമാർ അനുഭാവ പൂർണമായ നിലപാടെടുത്തതോടെയാണ് സമരം ഒത്തുതീർപ്പിലെത്തിയത്. സമരം നടന്ന ദിവസങ്ങളിൽ മുടങ്ങിയ ടെസ്‌റ്റുകൾ വേഗത്തിൽ പൂർത്തിയാക്കാനുള്ള നടപടികൾ എടുക്കാൻ ആർടിഒമാർക്ക് നിർദ്ദേശം നൽകിയിട്ടുണ്ട്. രണ്ടേമുക്കാൽ ലക്ഷത്തോളം അപേക്ഷകളാണ് മുടങ്ങിക്കിടക്കുന്നത്.
അതേസമയം, ഡ്രൈവിങ് പരിഷ്‌ക്കരണ സർക്കുലർ പിൻവലിക്കില്ല. പകരം സർക്കുലറിൽ ആവശ്യമായ മാറ്റങ്ങൾ വരുത്താനാണ് ഇന്നലെ നടന്ന യോഗത്തിൽ തീരുമാനിച്ചത്. ഒരു മോട്ടോർ വെഹിക്കിൾ ഇൻസ്‌പെക്‌ടർമാരുള്ള സ്‌ഥലത്ത്‌ ദിവസേന 40 ടെസ്‌റ്റും ഒന്നിലധികം എംവിഐ ഉള്ള സ്‌ഥലങ്ങളിൽ 80 ടെസ്‌റ്റും നടക്കും. ഇരട്ട ക്‌ളച്ച് സംവിധാനം തുടരും. ഡ്രൈവിങ് ടെസ്‌റ്റിന്റെ 18 വർഷം വരെ പഴക്കമുള്ള വാഹനങ്ങൾ അനുവദിക്കുമെന്നും മന്ത്രി യോഗത്തിൽ അറിയിച്ചു.
നിലവിലെ മാതൃകയിൽ ആദ്യം ഗ്രൗണ്ട് ടെസ്‌റ്റും തുടർന്ന് റോഡ് ടെസ്‌റ്റും നടത്തും. ടെസ്‌റ്റ് നടത്തുന്ന വാഹനത്തിൽ ക്യാമറ സ്‌ഥാപിക്കണമെന്ന ആവശ്യം ഡ്രൈവിങ് സ്‌കൂൾ ഉടമകൾ അംഗീകരിച്ചു. ടെസ്‌റ്റ് നടത്തുന്ന വാഹനത്തിൽ മോട്ടോർവാഹന വകുപ്പ് ക്യാമറ വാങ്ങി ഘടിപ്പിക്കും. ഇതിലെ ദൃശ്യങ്ങൾ ആറുമാസം വരെ ആർടി ഓഫീസിലെ കമ്പ്യൂട്ടറിൽ സൂക്ഷിക്കും. ഡ്രൈവിങ് ടെസ്‌റ്റിന് ഈടാക്കുന്ന ഫീസ് ഏകീകരിക്കാൻ സമിതിയെ നിയോഗിക്കും. കെഎസ്ആർടിസി പത്ത് കേന്ദ്രങ്ങളിൽ ഡ്രൈവിങ് സ്‌കൂളുകൾ ആരംഭിക്കുമെന്നും മന്ത്രി യോഗത്തിൽ അറിയിച്ചു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
