ന്യൂഡെല്‍ഹി: കോവിഡ് വ്യാപനവുമായി ബന്ധപ്പെട്ട് കേരളത്തിനെതിരെ രൂക്ഷ വിമര്‍ശനവുമായി കേന്ദ്ര ആരോഗ്യമന്ത്രി ഹര്‍ഷവര്‍ധന്‍. പ്രതിരോധത്തിലെ വീഴ്‌ചകള്‍ക്ക് ഇപ്പോള്‍ വന്‍ വില നല്‍കുന്നുവെന്ന് അദ്ദേഹം പറഞ്ഞു. ‘സണ്‍ഡേ സംവാദ്’ പരിപാടിയിലാണ് ആരോഗ്യമന്ത്രിയുടെ വിമര്‍ശനം.
കേരളത്തില്‍ തുടക്കത്തില്‍ കാണിച്ച പ്രതിരോധ നടപടികള്‍ പിന്നീട് ഉണ്ടായില്ല. സംസ്‌ഥാനത്തിന്റെ ഭാഗത്ത് നിന്നുണ്ടായ വന്‍ വീഴ്‌ചയാണ് ഇപ്പോഴത്തെ പ്രതിസന്ധിക്ക് കാരണമെന്നും മന്ത്രി പറഞ്ഞു. സണ്‍ഡേ സംവാദ് പരിപാടിക്ക് മുന്നോടിയായി പുറത്ത് വിട്ട ടീസറിലാണ് കേരളത്തെ വിമര്‍ശിക്കുന്ന ഭാഗം ഉള്‍പ്പെട്ടിരിക്കുന്നത്.
രാജ്യത്ത് കോവിഡ് രോഗികളുടെ പ്രതിദിന എണ്ണത്തില്‍ വര്‍ധനവ് ഉണ്ടാകുമ്പോഴും കേരളത്തില്‍ രോഗികളുടെ എണ്ണം വലിയ തോതില്‍ ഉയരുന്നുവെന്നാണ് കേന്ദ്ര ആരോഗ്യ മന്ത്രാലയത്തിന്റെ വിലയിരുത്തല്‍. പുതിയ കേസുകളില്‍ 15 ശതമാനവും കേരളത്തില്‍ നിന്നാണെന്നും ആരോഗ്യ മന്ത്രാലയം പറയുന്നു. കൂടാതെ ടെസ്‌റ്റുകളുടെ കാര്യത്തിലും വന്‍ വീഴ്‌ചയുണ്ടായെന്നാണ് പറയുന്നത്. ടെസ്‌റ്റുകളുടെ എണ്ണം കുറയുമ്പോഴും കേരളത്തില്‍ രോഗികളുടെ എണ്ണത്തില്‍ കുറവുണ്ടാകുന്നില്ല എന്നാണ് വിലയിരുത്തല്‍.
Also Read: റഷ്യന്‍ വാക്‌സിന്റെ മനുഷ്യരിലെ പരീക്ഷണത്തിന് ഡിസിജിഐയുടെ അനുമതി
രാജ്യത്ത് കേരളം, കര്‍ണാടക, ബംഗാള്‍, രാജസ്‌ഥാന്‍, ഛത്തീസ്ഗഢ് സംസ്‌ഥാനങ്ങളിലാണ് പുതുതായി കോവിഡ് കേസുകള്‍ ഉയരുന്നത്. അവിടങ്ങളില്‍ കേന്ദ്ര സംഘത്തെ അയച്ച് പ്രതിരോധ നടപടികള്‍ ഊര്‍ജ്ജിതമാക്കാനാണ് കേന്ദ്രത്തിന്റെ തീരുമാനം.
