മുസ്ലിം വിദ്യാർഥിയെ മർദ്ദിച്ച സംഭവം; അധ്യാപികക്കെതിരെ നടപടിയെടുക്കാൻ നിർദ്ദേശം
മുസാഫർനഗർ പോലീസ് വിദ്യാഭ്യാസ വകുപ്പിനാണ് നിർദ്ദേശം നൽകിയത്. കുട്ടിയെ മർദ്ദിക്കാൻ ടീച്ചർ നിർദ്ദേശം നൽകുന്ന വീഡിയോ സാമൂഹിക മാദ്ധ്യമങ്ങളിൽ വ്യാപകമായി പ്രചരിച്ചതിന് പിന്നാലെയാണ് നടപടി.
മുസാഫർനഗർ: ഉത്തർപ്രദേശിലെ മുസാഫർ നഗറിൽ ക്‌ളാസ് റൂമിൽ വച്ച് മുസ്ലിം വിദ്യാർഥിയെ ഹിന്ദു സഹപാഠികളെക്കൊണ്ട് അടിപ്പിച്ച അധ്യാപികക്കെതിരെ നടപടിയെടുക്കാൻ നിർദ്ദേശം. മുസാഫർനഗർ പോലീസ് വിദ്യാഭ്യാസ വകുപ്പിനാണ് നിർദ്ദേശം നൽകിയത്. കുട്ടിയെ മർദ്ദിക്കാൻ ടീച്ചർ നിർദ്ദേശം നൽകുന്ന വീഡിയോ സാമൂഹിക മാദ്ധ്യമങ്ങളിൽ വ്യാപകമായി പ്രചരിച്ചതിന് പിന്നാലെയാണ് നടപടി.
വിദ്യാർഥിയെ മർദ്ദിക്കാൻ മറ്റു കുട്ടികൾക്ക് നിർദ്ദേശം നൽകിയ അധ്യാപികക്കെതിരെ ശക്‌തമായ നടപടി സ്വീകരിക്കണമെന്ന് വിവിധ കോണുകളിൽ നിന്ന് ആവശ്യം ഉയർന്നിരുന്നു. ‘ഗുണനപട്ടിക പഠിക്കാത്തതിന്റെ പേരിൽ ഒരു കുട്ടിയെ അടിക്കാൻ സഹപാഠികൾക്ക് നിർദ്ദേശം നൽകുന്ന അധ്യാപികയുടെ വീഡിയോ ലഭിച്ചു. വീഡിയോയിലെ അധിക്ഷേപ പരാമർശത്തെ കുറിച്ച് സ്‌കൂൾ പ്രിൻസിപ്പലിനോട് വിശദീകരണം തേടി’-പോലീസ് അറിയിച്ചു.
ബാലാവകാശ കമ്മീഷനും അധ്യാപികക്കെതിരെ നടപടിയെടുക്കണമെന്ന് ആവശ്യപ്പെട്ടിട്ടുണ്ട്. ക്‌ളാസ് റൂമിൽവച്ച് മുസ്ലിം വിദ്യാർഥിയെ ഹിന്ദു സഹപാഠികളെക്കൊണ്ട് അടിപ്പിക്കാൻ അധ്യാപിക ശ്രമിക്കുന്നതും ചില കുട്ടികൾ ഇരയായ കുട്ടിയെ മുഖത്ത് അടിക്കുന്നതും കുട്ടി വേദനകൊണ്ടും അപമാനം കൊണ്ടും കരയുന്നതുമാണ് വീഡിയോയിൽ ഉള്ളത്. കൂടുതൽ ശക്‌തമായി അടിക്കാൻ സഹപാഠികളോട് അധ്യാപിക നിർദ്ദേശിക്കുന്നതും വീഡിയോയിൽ വ്യക്‌തമാണ്‌.
ഉത്തർപ്രദേശിലെ മുസാഫർനഗർ ജില്ലയിലെ താനക്ഷേത്രയിലെ ഖുബ്ബപൂർ ഗ്രാമത്തിലെ നേഹ പബ്‌ളിക് സ്‌കൂളിൽ തന്നെയാണ് സംഭവം നടന്നതെന്ന് മുസാഫർനഗർ പോലീസും രാത്രിയോടെ സ്‌ഥിരീകരിച്ചിട്ടുണ്ട്. ‘നിഷ്‌കളങ്കരായ കുട്ടികളുടെ മനസിൽ വർഗീയ വിഷം കുത്തിവെക്കുകയാണ്. വിദ്യാലയം പോലെ പവിത്രമായ സ്‌ഥലത്ത്‌ വെറുപ്പിന്റെ രാഷ്‌ട്രീയം വിൽക്കാൻ ശ്രമിക്കുകയാണ്. ഇന്ത്യയുടെ മുക്കിലും മൂലയിലും കത്തിപ്പടരുന്നതിനായി ബിജെപി വർഗീയത ഉപയോഗിക്കുന്നു. ഇന്ത്യയുടെ ഭാവി കുട്ടികളിലാണ്. അവരെ വെറുക്കരുത്. നമുക്ക് അവരെ സ്‌നേഹം പഠിപ്പിക്കാം’- സംഭവത്തിന്റെ വീഡിയോ പങ്കുവെച്ചുകൊണ്ട് രാഹുൽ ഗാന്ധി കുറിച്ചു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
