തിരുവനന്തപുരം: മുഖ്യമന്ത്രി പിണറായി വിജയന് ഉള്പ്പെടെയുള്ളവര് നിരീക്ഷണത്തില് പ്രവേശിച്ചു. ധനമന്ത്രി തോമസ് ഐസകിന് കോവിഡ് സ്ഥിരീകരിച്ച സാഹചര്യത്തിലാണിത്. ഇദ്ദേഹത്തിനെ തിരുവനന്തപുരം മെഡിക്കല് കോളേജ് ആശുപത്രിയില് പ്രവേശിപ്പിച്ചിട്ടുണ്ട്. വെള്ളിയാഴ്ച ചേര്ന്ന സിപിഎം സംസ്ഥാന സെക്രട്ടേറിയറ്റില് തോമസ് ഐസകിനൊപ്പം പങ്കെടുത്ത നേതാക്കളും മന്ത്രിയുടെ പേഴ്സണല് സ്റ്റാഫ് അംഗങ്ങള് ഉള്പ്പെടെയുള്ളവരും നിരീക്ഷണത്തില് പോകും.
മുഖ്യമന്ത്രി പിണറായി വിജയനെ കൂടാതെ, വെള്ളിയാഴ്ച ചേര്ന്ന സിപിഎം സംസ്ഥാന സെക്രട്ടേറിയറ്റില് ഐസക്കിനൊപ്പം പങ്കെടുത്തത്; ആരോഗ്യമന്ത്രി കെ കെ ശൈലജ, സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്,എസ് രാമചന്ദ്രന് പിള്ള ഉള്പ്പെടെയുള്ള നേതാക്കളാണ്. ഇവരെല്ലാവരും കോവിഡ് നിയന്ത്രണ നിയമമനുസരിച്ച് നിരീക്ഷണത്തില് പോകേണ്ടവരാണ്.
സംസ്ഥാനത്ത് ആദ്യമായാണ് ഒരു മന്ത്രിക്ക് കോവിഡ് സ്ഥിരീകരിക്കുന്നത്. മന്ത്രിയുടെ ആരോഗ്യനില തൃപ്തികരമാണെന്ന് ആശുപത്രി അധികൃതര് അറിയിച്ചു. കോവിഡ് സ്ഥിരീകരിക്കുന്ന സംസ്ഥാനത്തെ രണ്ടാമത്തെ ഉന്നത സിപിഎം നേതാവാണ് തോമസ് ഐസക്. നേരത്തെ കോവിഡ് സ്ഥിരീകരിച്ചിരുന്ന എം.എ ബേബി ഇപ്പോള് സുഖം പ്രാപിച്ചു.