മലയാളത്തിലെ ആദ്യ സൂപ്പർ ഹീറോ ചിത്രം ‘മിന്നൽ മുരളി’യിലെ വിഷ്വൽ എഫക്ട്സിന്റെ ബ്രേക്ക്ഡൗൺ വീഡിയോയുമായി സംവിധായകൻ ബേസിൽ ജോസഫ്. മികച്ച വിഷ്വൽ എഫക്ട്സിന് സംസ്ഥാന ചലച്ചിത്ര പുരസ്കാരം നേടിയതിന് പിന്നാലെയാണ് മിന്നൽ മുരളിയുടെ അണിയറ വിശേഷങ്ങളുടെ വീഡിയോ ബേസിൽ പങ്കുവച്ചത്.
മിന്നൽ മുരളിയുടെയും ഷിബുവിന്റെയും അമാനുഷിക രംഗങ്ങൾ എങ്ങനെയാണ് വിഎഫ്എക്സിന്റെ സഹായത്തോടെ ചെയ്തതെന്ന് വീഡിയോയിൽ കാണിക്കുന്നു. പല സീനുകളുടെ ഒറിജിനൽ രംഗങ്ങളും വിഎഫ്എക്സ് ചെയ്തതിനു ശേഷവുമുള്ള വ്യതാസവും കാണാം. വീഡിയോ ഇതിനോടകം വൈറൽ ആയിക്കഴിഞ്ഞു.
അതേസമയം ഇത്തവണത്തെ സംസ്ഥാന ചലച്ചിത്ര പുരസ്കാരത്തിൽ മികച്ച വിഷ്വല് എഫക്ട്, വസ്ത്രാലങ്കാരം, ശബ്ദമിശ്രണം, മികച്ച ഗായകന് എന്നീ വിഭാഗങ്ങളിലാണ് മിന്നല് മുരളിക്ക് അവാർഡ് ലഭിച്ചത്. മികച്ച വിഷ്വല് എഫക്ടിന് ആന്ഡ്ര്യൂസും വസ്ത്രാലങ്കാരത്തിന് മെല്വി ജെയും അവാർഡ് നേടിയപ്പോൾ ശബ്ദമിശ്രണത്തിന് ജസ്റ്റിന് ജോസും മികച്ച ഗായകനുള്ള അവാർഡ് പ്രദീപ് കുമാറും സ്വന്തമാക്കി.
Most Read: ആരാധനാലയങ്ങളിലെ ശബ്ദ നിയന്ത്രണം കർശനമാക്കാൻ തീരുമാനിച്ച് സംസ്ഥാന സർക്കാർ
