കണ്ണൂർ: ബാങ്ക് ജീവനക്കാരിയുടെ ക്വട്ടേഷൻ പ്രകാരം കരാറുകാരനെ ആക്രമിച്ച സംഭവത്തിൽ സംഘത്തിലെ ഒരാൾ കൂടി പിടിയിൽ. നീലേശ്വരം സ്വദേശി കെ അഖിൽ കുമാറിനെയാണ് (23) പരിയാരം എസ്‌ഐ കെവി സതീശൻ അറസ്‌റ്റ് ചെയ്‌തത്‌. ഇതോടെ കേസിൽ അറസ്‌റ്റിലായവരുടെ എണ്ണം ഏഴായി. കേസിൽ ഒരാളെ കൂടി പിടികൂടാനുണ്ട്.
കഴിഞ്ഞ ഏപ്രിൽ 19ന് രാത്രിയാണ് ചെറുതാഴം അതിയടത്തെ കരാറുകാരൻ പിവി സുരേഷ് ബാബുവിനെ ഒരു സംഘം ആളുകൾ വീട്ടിൽ കയറി ആക്രമിച്ചത്. തുടർന്ന് സംഭവത്തിൽ നാല് പ്രതികൾ അറസ്‌റ്റിലായതോടെയാണ് ആക്രമണത്തിന് പിന്നിൽ പ്രവർത്തിച്ചത് ക്വട്ടേഷൻ സംഘമാണെന്ന് പോലീസ് കണ്ടെത്തിയത്. കേരള ബാങ്ക് ഉദ്യോഗസ്‌ഥയായ സീമയാണ് സംഘത്തിന് ക്വട്ടേഷൻ നൽകിയത്.
ഇവരെ ഒരു മാസം മുൻപ് പരിയാരം പോലീസ് അറസ്‌റ്റ് ചെയ്‌തിരുന്നു. സംഭവത്തിലെ മറ്റ് പ്രതികളായ രതീഷ്, ജിഷ്‌ണു, അഭിലാഷ്, പി സുധീഷ്, കൃഷ്‌ണദാസ്‌ എന്നിവർ നേരത്തെ പോലീസിന്റെ പിടിയിലായിരുന്നു. അതേസമയം, ഒരാൾ ഒളിവിലാണ്. ഇയാൾക്കായുള്ള അന്വേഷണം ഊർജിതമാക്കിയതായി പരിയാരം പോലീസ് അറിയിച്ചു.
Read Also: ചെമ്പ്ര പീക്കിലെ പ്രവേശന ടിക്കറ്റ് ജീവനക്കാർ മറിച്ചു നൽകുന്നതായി ആരോപണം
