കോട്ടയം: ‘രണ്ടില’ ചിഹ്നത്തിൽ മത്സരിച്ച് ജയിച്ചവർ തിരിച്ചു വരണമെന്ന് ജോസ് കെ മാണി. ഇനി മുതൽ കേരളാ കോൺഗ്രസ് എം മാത്രമേ ഉള്ളൂവെന്നും ജോസ് കെ മാണി വാർത്താസമ്മേളനത്തിൽ പറഞ്ഞു.
കേരള കോൺഗ്രസ് എന്നത് ഒന്നുമാത്രമേയുള്ളൂവെന്ന് കേന്ദ്ര തെരഞ്ഞെടപ്പ് കമ്മീഷന്റെ വിധിയോടെ തെളിഞ്ഞിരിക്കുകയാണ്. രണ്ടില ചിഹ്നവും പാർട്ടി മേൽവിലാസവും ലഭിച്ചതോടെ സത്യം ജയിച്ചു. തങ്ങൾക്ക് ആരോടും ശത്രുതയില്ല. വാതിലുകൾ തുറന്നിട്ടിരിക്കുകയാണെന്നും ജോസ് കെ മാണി പറഞ്ഞു. നിലവിൽ സ്വതന്ത്ര നിലപാടിലുള്ള പാർട്ടി തദ്ദേശ തെരഞ്ഞെടുപ്പ് വരുന്നതിന് മുൻപ് രാഷ്ട്രീയ നിലപാട് സ്വീകരിക്കുമെന്നും അദ്ദേഹം വ്യക്തമാക്കി.
ജോസ് കെ മാണി വിഭാഗത്തിന് അനുകൂലമായുള്ള കേന്ദ്ര തെരഞ്ഞെടപ്പ് കമ്മീഷന്റെ അന്തിമ വിധി, വരാനിരിക്കുന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ അടക്കം ജോസ് വിഭാഗത്തിന് ഗുണം ചെയ്‌തേക്കും എന്നാണ് വിലയിരുത്തൽ. കെ എം മാണിയുടെ മരണത്തിനു പിന്നാലെ പാർട്ടിയിൽ ഉടലെടുത്ത തർക്കങ്ങളിൽ ഒരു ഘട്ടം വരെ ജോസഫിനായിരുന്നു മേൽക്കൈ. എന്നാൽ തെരഞ്ഞെടുപ്പ് ചിഹ്നം നഷ്ടപ്പെട്ടതോടെ ജോസഫ് വിഭാഗം കടുത്ത ആശങ്കയിലാണ്.
