കോഴിക്കോട്: കരിപ്പൂര് വിമാനാപകടത്തില് പരിക്കേറ്റ് ചികിത്സയിലായിരുന്ന ഒരാള് കൂടി മരിച്ചു. കോഴിക്കോട് മുക്കാളി സ്വദേശിനി മഞ്ജുള കുമാരി (38) ആണ് മരിച്ചത്. കോഴിക്കോട്ടെ ഒരു സ്വകാര്യ ആശുപത്രിയില് ചികിത്സയിലായിരുന്നു ഇവര്. ദുബായിലെ റാസല്ഖൈമയില് ഭര്ത്താവ് പ്രമോദിനൊപ്പമായിരുന്നു താമസം. അപകടത്തില് പെട്ട വിമാനത്തില് സുഹൃത്ത് രമ്യ മുരളീധരനൊപ്പമാണ് മഞ്ജുള യാത്ര ചെയ്തിരുന്നത്. അപകടത്തില് ഗുരുതരമായി പരിക്കേറ്റ മഞ്ജുള കുമാരി ഞായറാഴ്ച രാത്രിയോടെയാണ് മരിച്ചത്. പിതാവ്: ഭാസ്കര കുറുപ്പ്, മാതാവ് :പത്മിനി അമ്മ, സഹോദരങ്ങള്: മനോജ് കുമാര്, മഹിജകുമാരി, മഞ്ജുഷ
ഇതോടെ കരിപ്പൂര് വിമാനാപകടത്തില് മരണപ്പെട്ടവരുടെ ആകെ എണ്ണം 21 ആയി. ഈ മാസം ഏഴിനായിരുന്നു കേരളത്തെ നടുക്കിയ വിമാനദുരന്തം കരിപ്പൂരില് ഉണ്ടായത്. ദുബായില് നിന്നും വന്ദേഭാരത് മിഷന്റെ ഭാഗമായി യാത്രക്കാരുമായി വന്ന എയര് ഇന്ത്യ എക്സ്പ്രസ് ലാന്ഡിങ്ങിനിടെ തെന്നിമാറി 35 അടി താഴേക്ക് പതിച്ചാണ് അപകടമുണ്ടായത്.