ന്യൂ ഡെൽഹി: പ്രമുഖ ഷൂട്ടിങ് താരം ശ്രേയസി സിങ് ബിജെപിയിൽ ചേർന്നു. ചന്ദ്രശേഖർ-വാജ്പേയി സർക്കാരുകളിൽ കേന്ദ്രമന്ത്രി ആയിരുന്ന ദ്വിഗ് വിജയ് സിങ്ങിന്റെ മകളാണ് ശ്രേയസി. നടക്കാനിരിക്കുന്ന ബിഹാർ നിയമസഭാ തെരഞ്ഞെടുപ്പിൽ ബിജെപി സ്ഥാനാർഥി ആയി താരം മത്സരിക്കുമെന്ന് റിപ്പോർട്ടുകൾ സൂചിപ്പിക്കുന്നു. ബിജെപി ആസ്ഥാനത്ത് ഞായറാഴ്ച വൈകുന്നേരം പാർട്ടി അധ്യക്ഷനായ ജെ.പി നഡ്ഡയാണ് ശ്രേയസിക്ക് അംഗത്വം നൽകിയത്.
ഗിധാവുർ സ്വദേശിയായ ശ്രേയസി സിങ് 2018-ൽ ഓസ്ട്രേലിയയിൽ വെച്ച് നടന്ന കോമൺ വെൽത്ത് ഗെയിംസിൽ ഷൂട്ടിങ്ങിൽ സ്വർണ മെഡൽ നേടിയിരുന്നു. അർജുന അവാർഡും ആ വർഷം തന്നെ ലഭിച്ചിരുന്നു. ശ്രേയസിയുടെ പിതാവ് ദ്വിഗ് വിജയ് സിങ് ദേശീയ റൈഫിൾ അസോസിയേഷൻ പ്രസിഡണ്ട് ആയിരുന്നു.