ഇത്തവണത്തെ കേരള അന്താരാഷ്‌ട്ര ചലച്ചിത്ര മേളയില്‍ ഇടം നേടി രജീഷ വിജയന്‍-ഷൈന്‍ ടോം ചാക്കോ താരജോഡിയുടെ ചിത്രം ‘ലവ്’. മലയാളം സിനിമ ടുഡേ എന്ന വിഭാഗത്തിലാണ് ലവ് പ്രദര്‍ശിപ്പിക്കുന്നത്. ഖാലിദ് റഹ്‌മാൻ സംവിധാനം ചെയ്‌ത ചിത്രത്തില്‍ ദീപ്‌തി-അനൂപ് എന്നീ ദമ്പതികളുടെ വേഷത്തിലാണ് രജീഷയും ഷൈനും എത്തുന്നത്.
കോവിഡ് കാലത്ത് ആദ്യം ചിത്രീകരണം പൂര്‍ത്തിയാക്കിയ മലയാള ചിത്രമാണ് ലവ്. 24 ദിവസം കൊണ്ടാണ് ഇതിന്റെ ചിത്രീകരണം പൂര്‍ത്തിയാക്കിയത്. ചിത്രം നേരത്തെ ജിസിസിയിലും യുഎയിലും റിലീസ് ചെയ്‌തിരുന്നു. ലോക്ക്ഡൗണില്‍ തിയേറ്ററുകള്‍ അടച്ചിട്ട് തുറന്നതിന് ശേഷം ജിസിസിയിലും യുഎയിലും റിലീസ് ചെയ്‌ത ആദ്യ മലയാള ചിത്രം കൂടിയാണ് ലവ്. ദീപ്‌തി-അനൂപ് എന്നിവരുടെ വിവാഹശേഷം ജീവിതത്തില്‍ ഉണ്ടാകുന്ന തര്‍ക്കങ്ങളും പ്രശ്‌നങ്ങളുമാണ് ചിത്രത്തില്‍ വരച്ചുകാട്ടുന്നത്.
അനുരാഗ കരിക്കിന്‍വെള്ളം, ഉണ്ട എന്നീ ചിത്രങ്ങള്‍ക്ക് ശേഷം ഖാലിദ് റഹ്‌മാൻ സംവിധാനം ചെയ്‌ത ചിത്രമാണ് ലവ്. ചിത്രത്തില്‍ രജീഷക്കും ഷൈനും ഒപ്പം നിരവധി പ്രമുഖ താരങ്ങളും അണിനിരക്കുന്നുണ്ട്. ഗോകുലന്‍, വീണ നന്ദകുമാര്‍, ജോണി ആന്റണി, സുധി കോപ്പ എന്നിവരും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ജിംഷി ഖാലിദ് ഛായാഗ്രഹണം നിര്‍വഹിച്ച ചിത്രത്തിന്റെ എഡിറ്റിംഗ് നൗഫല്‍ അബ്‌ദുള്ളയാണ് നിര്‍വഹിച്ചത്.
Read also : ‘മാര’ ട്രെയ്‌ലര്‍ എത്തി; ചാര്‍ലിയും ടെസയും ഇനിമുതൽ മാരയും പാറുവും
