തിരുവനന്തപുരം: പെരിയ ഇരട്ടക്കൊലക്കേസിന്റെ കേസ് ഡയറി ക്രൈംബ്രാഞ്ച് സിബിഐക്ക് കൈമാറി. പെരിയ കൊലപാതകക്കേസില്‍ സിബിഐ അന്വേഷണം ഒഴിവാക്കേണ്ടതില്ലെന്ന്‌ കഴിഞ്ഞ ദിവസം സുപ്രീംകോടതി വിധി പുറപ്പെടുവിച്ചിരുന്നു. ഇതിന് പിന്നാലെയാണ് സിബിഐക്ക് ക്രൈംബ്രാഞ്ച് കേസ് ഡയറി കൈമാറിയത്.
നേരത്തെ നാല് തവണ ഡിജിപിക്കും ക്രൈംബ്രാഞ്ച് മേധാവിക്കും സിബിഐ കേസ് രേഖകള്‍ ആവശ്യപ്പെട്ട് കത്ത് നല്‍കിയിരുന്നെങ്കിലും കേസ് ഡയറിയോ മറ്റ് രേഖകളോ പോലീസ് കൈമാറിയിരുന്നില്ല. മാത്രവുമല്ല ഹൈക്കോടതി സിംഗിള്‍ ബെഞ്ചും ഡിവിഷന്‍ ബെഞ്ചും കേസ് സിബിഐ അന്വേഷിക്കണമെന്ന് ഉത്തരവിട്ടിട്ടും പോലീസ് സിബിഐയോട് നിസ്സഹരണമാണ് തുടര്‍ന്നത്.
Read Also: ശനിയാഴ്‌ച രാജ്യവ്യാപകമായി പ്രതിഷേധം നടത്താന്‍ ആഹ്വാനവുമായി കര്‍ഷക കൂട്ടായ്‌മ
എന്നാല്‍ കൊലപാതക കേസ് സിബിഐ അന്വേഷിക്കുന്നതിന് എതിരെ സംസ്‌ഥാന സര്‍ക്കാര്‍ സമര്‍പ്പിച്ച ഹരജി തള്ളിയ സുപ്രീം കോടതി എത്രയും പെട്ടന്ന് കേസുമായി ബന്ധപ്പെട്ട കേസ് ഡയറി സിബിഐക്ക് കൈമാറണമെന്ന് ആവശ്യപ്പെടുക ആയിരുന്നു.
പോലീസ് കൃത്യമായി കേസ് അന്വേഷിക്കുന്നുണ്ടെന്നും സിബിഐ അന്വേഷിക്കേണ്ട കാര്യമില്ലെന്നുമുള്ള സംസ്‌ഥാന സര്‍ക്കാരിന്റെ വാദം സുപ്രീം കോടതി അംഗീകരിച്ചില്ല. ഇതിന് പിന്നാലെയാണ് ക്രൈംബ്രാഞ്ച് സിബിഐക്ക് കേസ് ഡയറി കൈമാറിയത്.
