സിനിമയിൽ സജീവമല്ലെങ്കിലും സോഷ്യൽ മീഡിയയിൽ നിറഞ്ഞുനിൽക്കുന്ന താരജോഡികളാണ് ഇന്ദ്രജിത്തും പൂർണ്ണിമയും. തങ്ങളുടെ ജീവിതത്തിലെ വിശേഷങ്ങളും മക്കളുടെ കലാപ്രകടനങ്ങളും ആരാധകർക്കായി സോഷ്യൽ മീഡിയയിൽ പങ്കുവക്കാറുണ്ട്. ഇപ്പോഴിതാ തങ്ങളുടെ ഇളയമകൾ നക്ഷത്രയുടെ ഗാനാലാപനം ആണ് പൂർണ്ണിമ ആരാധകർക്കായി ഇൻസ്റ്റഗ്രാമിൽ പങ്കുവച്ചിരിക്കുന്നത്.
അഞ്ചുവർഷം മുമ്പാണ് വീഡിയോ എടുത്തതെങ്കിലും ഇപ്പോഴാണ് പൂർണ്ണിമ ഇത് സോഷ്യൽ മീഡിയയിൽ പങ്കുവക്കുന്നത്. ‘പ്രേമം’ എന്ന സിനിമയിലെ ‘മലരേ’ എന്ന ഗാനമാണ് നക്ഷത്ര പാടുന്നത്. വരികൾ കൃത്യമല്ലെങ്കിലും അതൊന്നും കാര്യമാക്കാതെ ലയിച്ചുള്ള ആലാപനത്തിലാണ് നക്ഷത്ര.
“ഇത്ര വർഷത്തിനിടെ കേട്ടതിൽ ഏറ്റവും ക്യൂട്ടായ വേർഷൻ. കുറച്ചു സമയം എടുത്തു എന്താണ് എന്നു മനസ്സിലാകാൻ,” എന്നാണ് വിജയ് യേശുദാസ് വീഡിയോക്ക് നൽകിയിരിക്കുന്ന കമന്റ്.