തെന്നിന്ത്യന്‍ താരം മഹേഷ് ബാബുവും മലയാളികളുടെ ഇഷ്‌ടതാരം കീർത്തി സുരേഷും കഥാപാത്രങ്ങളായി എത്തുന്ന ബിഗ് ബജറ്റ് ചിത്രം ‘സര്‍ക്കാരു വാരി പാട്ട’ തിയേറ്ററുകളിലേക്ക്. മെയ് 12ന് ചിത്രം റിലീസ് ചെയ്യും.
സിനിമയുടെ ചിത്രീകരണം പൂര്‍ത്തിയായതിന് പിന്നാലെ അണിയറ പ്രവർത്തകർ റിലീസ് പ്രഖ്യാപിക്കുകയായിരുന്നു. ഈ വര്‍ഷം ജനുവരി 13ന് റിലീസ് പ്രഖ്യാപിച്ചിരുന്ന ചിത്രം കോവിഡ് പശ്‌ചാത്തലത്തില്‍ മാറ്റി വെക്കുകയായിരുന്നു.
പരശുറാം പെട്‌ല കഥയെഴുതി സംവിധാനം ചെയ്യുന്ന ചിത്രം മൈത്രി മൂവി മേക്കേഴ്‌സ്, ജിഎംബി എന്റര്‍ടൈന്‍മെന്റ്, 14 റീല്‍സ് പ്ളസ് എന്നിവയുടെ ബാനറില്‍ നവീന്‍ യെര്‍നേനി, വൈ രവിശങ്കര്‍, രാം അജന്ത, ഗോപിചന്ദ് അജന്ത എന്നിവര്‍ സംയുക്‌തമായാണ് നിര്‍മിക്കുന്നത്.
‘ഗീതാ ഗോവിന്ദം’ എന്ന ചിത്രത്തിന് ശേഷം പരശുറാം സംവിധാനം ചെയ്യുന്ന ‘സര്‍ക്കാരു വാരി പാട്ട’ രണ്ടര വര്‍ഷത്തിന് ശേഷം റിലീസിന് ഒരുങ്ങുന്ന മഹേഷ് ബാബു കൂടിയാണ്. കീര്‍ത്തി സുരേഷിന് പുറമെ മലയാളി കൂടിയായ പുതുമുഖ നടി സൗമ്യ മേനോനും ചിത്രത്തില്‍ പ്രധാന കഥാപാത്രത്തെ അവതരിപ്പിച്ചിരിക്കുന്നു. വെണ്ണലാ കിഷോര്‍, സമുദ്രക്കനി, സുബ്ബരാജു തുടങ്ങിയവരും ചിത്രത്തിലുണ്ട്. ആര്‍ മാധി ഛായാഗ്രഹണം നിര്‍വഹിക്കുന്ന ചിത്രത്തിന് ഈണം പകരുന്നത് എസ് താമനാണ്.
Most Read: ഐപിഎൽ; സീസണിലെ ആദ്യ ജയം തേടി മുംബൈ ഇന്നിറങ്ങും
