വീണ്ടും സംഗീത സംവിധായകയാകാന്‍ ഒരുങ്ങി പ്രശസ്‌ത പിന്നണി ഗായിക സയനോര ഫിലിപ്പ്. ‘കറുത്ത ഭൂമി‘ എന്ന ചിത്രത്തിന് സംഗീതം ഒരുക്കിയാണ് ഒരിക്കല്‍ കൂടി സയനോര സംഗീത സംവിധാനത്തിലേക്ക് കടക്കുന്നത്. നേരത്തെ സുരാജ് വെഞ്ഞാറമൂട് പ്രധാന കഥാപാത്രമായെത്തിയ ‘കുട്ടന്‍പിള്ളയുടെ ശിവരാത്രി’ എന്ന ചിത്രത്തിന്റെ സംഗീതവും പശ്‌ചാത്തലവും സയനോര നിര്‍വഹിച്ചിരുന്നു.
കറുപ്പിന്റെ പേരില്‍ മാറ്റി നിര്‍ത്തപ്പെട്ട ഒരു ഗായികയുടെ അതിജീവനത്തിന്റെ കഥ പറയുന്ന ചിത്രമാണ് ആയില്യന്‍ സംവിധാനം ചെയ്യുന്ന ‘കറുത്ത ഭൂമി’. ചിത്രത്തിന്റെ സംഗീതവും പശ്‌ചാത്തലവും ഒരുക്കാന്‍ പോകുന്ന വിവരം സയനോര തന്നെയാണ് തന്റെ ഫേസ്ബുക്ക് പോസ്‌റ്റിലൂടെ അറിയിച്ചത്.
‘കറുത്ത ഭൂമി’ വരച്ചുവെക്കുന്ന കഥാപാശ്‌ചാത്തലം തനിക്ക് തരുന്ന ഊര്‍ജം ചെറുതല്ലെന്നും തീയേറ്ററുകള്‍ തുറക്കുന്ന കാലത്തിനായി കാത്തിരിക്കുന്ന തന്നെ പോലുള്ളവര്‍ക്ക് ഈ സിനിമ പ്രതീക്ഷയുടെ കുഞ്ഞി വെളിച്ചമാണെന്നും സയനോര ഫേസ്ബുക്ക് പോസ്‌റ്റില്‍ പറഞ്ഞു.
99കെ തീയേറ്റേഴ്സിന്റെ ബാനറില്‍ സംവിധായകന്‍ വൈശാഖ് ആണ് ചിത്രം നിര്‍മിക്കുന്നത്. സംവിധായകന്‍ ആയില്യന്റെ ഭാര്യ ഡോ. സായ്‌ലേഷ്യ സംഭാഷണം നിര്‍വഹിക്കുന്ന ചിത്രത്തില്‍ രമ്യ സര്‍വദാ ദാസാണ് മുഖ്യ കഥാപാത്രമായി എത്തുന്നത്.
Read Also: ക്ഷീണിതനായ മുഖ്യമന്ത്രി യാഥാർഥ്യത്തിൽ നിന്ന് ഒളിച്ചോടുന്നു; നിതീഷ് കുമാറിനെതിരെ തേജസ്വി യാദവ്
