പാലക്കാട്: അട്ടപ്പാടിയിലും ഷിഗെല്ല സ്ഥിരീകരിച്ചു. ഒരു വയസും 8 മാസവും പ്രായമായ കുട്ടിക്കാണ് രോഗം. പാലക്കാട് ജില്ലയിൽ ആദ്യമായി ഷിഗെല്ല റിപ്പോർട് ചെയ്യുന്ന സ്ഥലമാണ് അട്ടപ്പാടി. കുട്ടി കോഴിക്കോട് മെഡിക്കൽ കോളേജ് ആശുപത്രിയിൽ ചികിൽസയിലാണ്.
സംസ്ഥാനത്ത് ആദ്യത്തെ ഷിഗെല്ല കേസ് റിപ്പോർട് ചെയ്തത് കോഴിക്കോട് ജില്ലയിലാണ്. കഴിഞ്ഞ ഡിസംബറിൽ ജില്ലയിൽ അഞ്ച് പേർക്കാണ് രോഗം സ്ഥിരീകരിച്ചത്. തുടർന്ന്, എറണാകുളത്തും കണ്ണൂരും രോഗം റിപ്പോർട് ചെയ്തിരുന്നു.
ഷിഗെല്ല എന്ന ബാക്ടീരിയ മൂലമുണ്ടാകുന്ന രോഗമാണിത്. വയറിളക്കം, പനി, വയറുവേദന, അടിക്കടി മലശോധനക്ക് തോന്നുക എന്നിവയാണ് പ്രധാന രോഗലക്ഷണങ്ങൾ. എല്ലാ ഷിഗെല്ല രോഗികളും ലക്ഷങ്ങൾ പ്രകടിപ്പിക്കണമെന്നില്ല. ഷിഗെല്ല ബാക്ടീരിയ ശരീരത്തിൽ പ്രവേശിച്ച് മൂന്ന് ദിവസത്തിന് ശേഷമാകും രോഗലക്ഷണങ്ങൾ കണ്ടുതുടങ്ങുക.
Also Read: ഡോ. ബാബുക്കുട്ടിക്ക് ആദരം; 50 ലക്ഷം രൂപയുടെ ഇന്ഷുറന്സ് അനുവദിച്ചു