വയനാട് : ജില്ലയിലേക്ക് പുതുതായി 92,000 ഡോസ് കോവിഡ് വാക്സിൻ കൂടിയെത്തി. കൽപ്പറ്റ, ബത്തേരി, മാനന്തവാടി എന്നിവിടങ്ങളിൽ മെഗാ വാക്സിനേഷൻ ക്യാമ്പുകൾ നടത്തുന്നതിന്റെ ഭാഗമായാണ് ഇപ്പോൾ കൂടുതൽ വാക്സിൻ ജില്ലയിലെത്തിച്ചത്. ഇതിലൂടെ വാക്സിനേഷൻ വേഗത്തിലാക്കാനാണ് ആരോഗ്യവകുപ്പ് ലക്ഷ്യം വെക്കുന്നത്.
ജില്ലയിൽ നിലവിൽ 41 വാക്സിനേഷൻ കേന്ദ്രങ്ങളാണുള്ളത്. ഇവിടങ്ങളിൽ നിന്നും ദിവസേന 5000 വാക്സിനുകളാണ് നൽകുന്നത്. ഈ അളവ് കൂട്ടി അടുത്ത ആഴ്ചയോടെ പ്രതിദിനം 9,000 ഡോസ് വാക്സിൻ ആളുകൾക്ക് വിതരണം ചെയ്യാനാണ് അധികൃതർ ലക്ഷ്യം വെക്കുന്നത്. നിലവിൽ 60 വയസിന് മുകളിൽ ഉള്ളവർക്കും, മറ്റ് രോഗങ്ങൾ ഉള്ള 45 വയസിന് മുകളിൽ ഉള്ളവർക്കുമാണ് വാക്സിൻ വിതരണം ചെയ്യുന്നത്.
കൂടാതെ ജില്ലയിൽ നിലവിൽ പ്രതിദിനം രോഗബാധിതരാകുന്ന ആളുകളുടെ എണ്ണത്തിൽ ഉണ്ടാകുന്ന കുറവ് ആശ്വാസം പകരുന്നുണ്ട്. കഴിഞ്ഞ ഒരാഴ്ചയായി ജില്ലയിലെ കോവിഡ് രോഗികളുടെ എണ്ണം മൂന്നക്കം കടന്നിട്ടില്ല. ഇതേരീതിയിൽ ആരോഗ്യവകുപ്പിന്റെ മാർഗ നിർദേശങ്ങൾ പൂർണമായും പാലിച്ചുകൊണ്ട് മുന്നോട്ട് പോയാൽ രോഗവ്യാപനം വലിയ രീതിയിൽ കുറക്കാൻ സാധിക്കുമെന്ന് അധികൃതർ വ്യക്തമാക്കി.
Read also : നേമത്തേക്കില്ല, പുതുപ്പള്ളി ഇല്ലെങ്കിൽ ഇത്തവണ മൽസരിക്കില്ല; ഉമ്മൻ ചാണ്ടി