ബെംഗളൂരു: കർണാടകയിലെ സർക്കാർ കോളജുകളിലുള്ള ഹിജാബ് നിരോധനത്തില് കര്ണാടക ഹൈക്കോടതിയുടെ നിര്ണായക വിധി ഇന്ന്. ഹിജാബ് നിരോധനത്തിന് എതിരായ വിവിധ ഹരജികളിൽ രാവിലെ 10.30നാണ് കർണാടക ഹൈക്കോടതിയിലെ വിശാല ബെഞ്ച് വിധി പറയുക.
വിധി പ്രഖ്യാപനത്തിന്റെ പശ്ചാത്തലത്തില് സംസ്ഥാന സര്ക്കാര് തലസ്ഥാന നഗരമായ ബെംഗളുരുവില് ഒരാഴ്ചത്തേക്ക് പ്രകടനങ്ങള്ക്ക് വിലക്കേര്പ്പെടുത്തി. ക്രമസമാധാനം നിലനിര്ത്താന് വേണ്ടിയാണ് ഇതെന്നാണ് സര്ക്കാര് വാദം. വിധി വരുന്ന സാഹചര്യത്തിൽ ബെംഗളുരുവില് നിരോധനാജ്ഞ പ്രഖ്യാപിച്ചതായി പോലീസ് കമ്മീഷണർ കമാൽ പന്ത് അറിയിച്ചു. നാളെ മുതൽ 21 വരെയാണ് നിരോധനാജ്ഞ.
ആഹ്ളാദപ്രകടനങ്ങൾ, പ്രതിഷേധങ്ങൾ, ഒത്തുചേരലുകൾ എന്നിവക്കെല്ലാം സമ്പൂർണ വിലക്ക് ഏർപ്പെടുത്തിയിട്ടുണ്ട്. ചീഫ് ജസ്റ്റിസ് ഋതു രാജ് അവസ്തി, ജസ്റ്റിസ് കൃഷ്ണ എസ് ദീക്ഷിത്, ജസ്റ്റിസ് ജെഎം ഖാസി എന്നിവരടങ്ങുന്ന വിശാല ബെഞ്ച് 11 ദിവസമാണ് വാദം കേട്ടത്. വിധി വരുംവരെ ക്ളാസ് മുറികളിൽ ഏതെങ്കിലും തരത്തിലുള്ള മതപരമായ വസ്ത്രങ്ങൾ ധരിക്കുന്നത് കോടതി വിലക്കുകയും ചെയ്തിരുന്നു.
Most Read: കൊച്ചി നേവൽ എയർ സ്റ്റേഷൻ; ഡ്രോണുകൾ പറത്തുന്നതിന് നിയന്ത്രണം