തിരുവനന്തപുരം: ഇന്ന് മുതൽ നിത്യോപയോഗ സാധനങ്ങളുടെ വില വർധിക്കും. ജിഎസ്ടി ഏർപ്പെടുത്തിയ പുതിയ നിരക്കാണ് ഇന്ന് മുതൽ പ്രാബല്യത്തിൽ വരുന്നത്. മിൽമയുടെ ഉൽപ്പന്നങ്ങൾക്ക് മൂന്ന് രൂപ വരെയാണ് ജിഎസ്ടി വർധിക്കുന്നത്. ഇന്ന് മുതൽ പാൽ ഉൽപ്പന്നങ്ങൾക്ക് വില കൂടുമെന്ന് മിൽമ ചെയർമാൻ കെഎസ് മണി അറിയിച്ചിട്ടുണ്ട്.
തൈര്, മോര്, ലെസി എന്നിവക്ക് 5 ശതമാനം വർധനയുണ്ടാകും. പാൽ ഉൽപ്പന്നങ്ങൾക്ക് ജിഎസ്ടി ഏർപ്പെടുത്തിയതാണ് വില കൂടാൻ കാരണം. അതേസമയം, ജിഎസ്ടി ഏർപ്പെടുത്തിയതിനാൽ പാൽവില കൂട്ടുന്ന കാര്യം തീരുമാനമായിട്ടില്ല. വരും ദിവസങ്ങളിൽ ഏർപ്പെടുത്താനിടയുണ്ടെന്നും മിൽമ ചെയർമാൻ കെഎസ് മണി അറിയിച്ചിട്ടുണ്ട്.
പാക്ക് ചെയ്ത് ലേബൽ ഒട്ടിച്ച ബ്രാൻഡഡ് അല്ലാത്ത ഭക്ഷ്യവസ്തുക്കളെ ജിഎസ്ടി പരിധിയിൽ ഉൾപ്പെടുത്താൻ തീരുമാനിച്ചിരുന്നു. ഇതിന്റെ അടിസ്ഥാനത്തിലാണ് പാക്കറ്റിലുള്ള മോരിനും തൈരിനും പുറമെ മീൻ, തേൻ, ശർക്കര, പപ്പടം എന്നിവക്കെല്ലാം 5 ശതമാനം നികുതി ഇന്ന് മുതൽ പ്രാബല്യത്തിൽ വരുന്നത്.
Most Read: സംസ്ഥാനത്ത് ഇന്നും ശക്തമായ മഴക്ക് സാധ്യത; മൂന്ന് ജില്ലകളിൽ യെല്ലോ അലർട്