മാനന്തവാടി: മാനന്തവാടിയില്‍ സ്‌ഥാപിച്ച അസാപ് കമ്മ്യൂണിറ്റി സ്‌കില്‍ പാര്‍ക്കിന്റെ ഉല്‍ഘാടനം ഈ മാസം 27ന് നടക്കും. പാര്‍ക്കിന്റെ ഉല്‍ഘാടനം മുഖ്യമന്ത്രി പിണറായി വിജയന്‍ വീഡിയോ കോണ്‍ഫറെന്‍സിങ്ങിലൂടെ നിര്‍വഹിക്കും.
വിവിധ തൊഴില്‍ മേഖലകളിലേക്ക് എത്തിപ്പെടാന്‍ പാകത്തില്‍ മികവുറ്റ രീതിയില്‍ യുവജനതയെ വളര്‍ത്തിയെടുക്കുകയെന്ന ലക്ഷ്യത്തോടെ സംസ്‌ഥാന സര്‍ക്കാര്‍ ആസൂത്രണം ചെയ്യുന്ന പദ്ധതിയാണ് അസാപ്. അസാപ്പിന്റെ സേവനങ്ങള്‍ പൊതുജനത്തിന് കൂടി ലഭ്യമാക്കുക എന്ന ഉദ്ദേശത്തോടെയാണ് സ്‌കില്‍ പാര്‍ക്കുകള്‍ക്ക് തുടക്കമിടുന്നത്. പൊതുസ്വകാര്യ പങ്കാളിത്തത്തോടെ നടപ്പിലാക്കുന്ന മികവുറ്റതും നൂതനവുമായ തൊഴില്‍ പരിശീലന കേന്ദ്രങ്ങളാണ് സ്‌കില്‍ പാര്‍ക്കുകള്‍.
Read also: ആര്‍ദ്രം മിഷന്‍: 212 പ്രാഥമിക ആരോഗ്യ കേന്ദ്രങ്ങള്‍ കൂടി കുടുംബാരോഗ്യ കേന്ദ്രങ്ങളാകും
സംസ്‌ഥാനത്ത് വിഭാവനം ചെയ്‌ത 16 കമ്മ്യൂണിറ്റി സ്‌കില്‍ പാര്‍ക്കുകളില്‍ ഒന്‍പതെണ്ണം പ്രവര്‍ത്തനം ആരംഭിച്ചിട്ടുണ്ട്. 25,000ത്തിലധികം ചതുരശ്ര അടി വിസ്‌തീര്‍ണത്തില്‍ അന്താരാഷ്‍ട്ര നിലവാരമുള്ള സൗകര്യങ്ങളോടെയാണ് പാര്‍ക്കുകള്‍ നിര്‍മ്മിക്കുന്നത്. മാനന്തവാടി ഗവണ്‍മെന്റ് കോളേജിന് സമീപമാണ് പാര്‍ക്ക് നിര്‍മ്മിച്ചിരിക്കുന്നത്.
