പത്തനംതിട്ട: മുറ്റത്ത് കളിച്ചുകൊണ്ടിരുന്ന രണ്ട് വയസുകാരനെ തട്ടിക്കൊണ്ട് പോകാൻ ശ്രമിച്ച സംഭവത്തിൽ മധ്യപ്രദേശ് സ്വദേശികളായ രണ്ട് പേർ പിടിയിൽ. വെച്ചൂച്ചിറ വെണ്കുറിഞ്ഞി പുള്ളോലിക്കല് കിരണിന്റെ മകന് വൈഷ്ണവിനെയാണ് തട്ടിക്കൊണ്ടുപോകാന് ശ്രമിച്ചത്. സംഭവത്തിൽ മധ്യപ്രദേശ് സ്വദേശികളായ നങ്കുസിങ്(27), സോണിയ ദുര്വേ(27) എന്നിവരാണ് അറസ്റ്റിലായത്.
ഇന്നലെ രാവിലെ 9 മണിയോടെയാണ് സംഭവം നടന്നത്. വൈഷ്ണവ് വീട്ടുമുറ്റത്ത് സൈക്കിള് ചവിട്ടുന്നത് കണ്ട ശേഷം അമ്മ സൗമ്യ അടുക്കളയിലേക്ക് പോയിരുന്നു. കുറച്ചു സമയം കഴിഞ്ഞ് കുട്ടിയുടെ അനക്കം ഒന്നും ഇല്ലാതായതോടെ തിരികെ വന്ന് നോക്കുമ്പോഴാണ് കുട്ടിയെ കാണാനില്ലെന്ന് അറിയുന്നത്. തുടർന്ന് നടത്തിയ പരിശോധനയിൽ റോഡിൽ കുട്ടിയുടെ സൈക്കിൾ മറിഞ്ഞു കിടക്കുന്നത് കണ്ടു. പിന്നാലെ 100 മീറ്ററോളം അകലെ ഇതരസംസ്ഥാന തൊഴിലാളിയായ പുരുഷനും സ്ത്രീക്കും ഒപ്പം കുട്ടിയെ കാണുകയും ചെയ്തു.
തുടർന്ന് ഓടിയെത്തിയ വീട്ടുകാർ തട്ടിക്കൊണ്ട് പോയവരിൽ നിന്നും കുട്ടിയെ പിടിച്ചുവാങ്ങി. പിന്നാലെ അവിടെ കൂടിയ നാട്ടുകാർ ചേർന്ന് ഇരുവരെയും തടഞ്ഞുവച്ചു പോലീസിൽ ഏൽപ്പിക്കുകയായിരുന്നു.
Read also: അഞ്ച് വർഷത്തിനുള്ളിൽ പെട്രോൾ ഒഴിവാക്കും; ബദൽ നീക്കം വേഗത്തിലാക്കി ഇന്ത്യ