എറണാകുളം: ലൈംഗിക പീഡനക്കേസിൽ മുൻ‌കൂർ ജാമ്യാപേക്ഷയുമായി സംവിധായകൻ ബാലചന്ദ്ര കുമാർ ഹൈക്കോടതിയിൽ. നടിയെ ആക്രമിച്ച കേസിലെ പ്രതിയായ നടൻ ദിലീപാണ് തനിക്കെതിരായ ആരോപണങ്ങൾക്ക് പിന്നിലെന്ന് ബാലചന്ദ്രകുമാർ ജാമ്യാപേക്ഷയിൽ വ്യക്‌തമാക്കി.
പീഡന പരാതി കെട്ടിച്ചമച്ചതാണെന്നും, കേസിൽ ദിലീപിനെതിരെ താൻ വെളിപ്പെടുത്തലുകൾ നടത്തിയതിന്റെ പ്രതികാരമായാണ് ഇത്തരത്തിൽ പീഡന പരാതി നൽകിയിരിക്കുന്നതെന്നും അദ്ദേഹം കൂട്ടിച്ചേർത്തു. കൂടാതെ പരാതിക്കാരിയുടെ ആരോപണങ്ങളിൽ വസ്‌തുത ഇല്ലെന്നും അദ്ദേഹം വ്യക്‌തമാക്കി.
കണ്ണൂർ സ്വദേശിനിയായ യുവതിയാണ് ബാലചന്ദ്ര കുമാറിനെതിരെ പീഡന പരാതി നൽകിയിരിക്കുന്നത്. 10 വർഷം മുൻപ് ജോലി വാഗ്‌ദാനം ചെയ്‌ത്‌ തന്നെ വിളിച്ചു വരുത്തി പീഡിപ്പിക്കുകയായിരുന്നു എന്നാണ് യുവതിയുടെ പരാതി. പരാതിയിൽ എളമക്കര പോലീസാണ് ബാലചന്ദ്ര കുമാറിനെതിരെ കേസെടുത്തത്.
Read also: കാസർഗോഡ് ജനറൽ ആശുപത്രിയിലെ മരം കൊള്ള; വിജിലൻസ് പരിശോധന നടത്തി
