തൃശൂർ: കൊടകര കള്ളപ്പണക്കേസ് ഉൾപ്പടെ പണമിടപാട് സംബന്ധിച്ച് ബിജെപിയെ പ്രതിക്കൂട്ടിൽ നിർത്തുന്ന കേസുകളിൽ അന്വേഷണം പുരോഗമിക്കെ സംസ്‌ഥാന വ്യാപക പ്രതിഷേധവുമായി ബിജെപി. കള്ളക്കേസ് ചുമത്തി നേതാക്കളെ സർക്കാർ വേട്ടയാടുന്നു എന്ന് ആരോപിച്ചാണ് ബിജെപി ഇന്ന് സംസ്‌ഥാന വ്യാപക പ്രതിഷേധം നടത്തുന്നത്.
തൃശൂർ ജില്ലയിലെ 5000 കേന്ദ്രങ്ങളിൽ പ്രതിഷേധ ജ്വാല തെളിയിക്കും. തൃശൂർ പോലീസ് ക്ളബിന് മുന്നിൽ നടക്കുന്ന പ്രതിഷേധം ബിജെപി സംസ്‌ഥാന അധ്യക്ഷൻ കെ സുരേന്ദ്രൻ ഓൺലൈൻ ആയി ഉൽഘാടനം ചെയ്യും.
സംസ്‌ഥാന സർക്കാരിന്റെ താൽപര്യപ്രകാരമാണ് അന്വേഷണം പുരോഗമിക്കുന്നത് എന്നാണ് ബിജെപിയുടെ ആരോപണം. പാർട്ടിയുടെ സംസ്‌ഥാന-ജില്ലാ നേതാക്കൾ വിവിധ മണ്ഡലങ്ങളിലെ പ്രതിഷേധ പരിപാടികളിൽ പങ്കെടുക്കും.
അതിനിടെ കൊടകര കുഴൽപ്പണക്കേസിൽ ബിജെപി ജില്ലാ സെക്രട്ടറി ഉല്ലാസ് ബാബുവിൽ നിന്ന് അന്വേഷണ സംഘം ഇന്ന് മൊഴിയെടുത്തേക്കും. നിർദ്ദേശം ലഭിക്കുന്ന മുറക്ക് പോലീസ് ക്ളബിൽ ഹാജരാകണമെന്ന് അന്വേഷണ സംഘം ഉല്ലാസിനോട് ആവശ്യപ്പെട്ടിട്ടുണ്ട്.
Also Read: ലക്ഷദ്വീപിൽ ഭക്ഷ്യകിറ്റ് വിതരണം ചെയ്യണം; ഹരജി ഇന്ന് ഹൈക്കോടതി പരിഗണിക്കും
