കേപ് ടൗൺ: ദക്ഷിണാഫ്രിക്കയിൽ കോവിഡ് വ്യാപനത്തിന്റെ അഞ്ചാം തരംഗമാണെന്ന മുന്നറിയിപ്പുമായി ആരോഗ്യ വിദഗ്‌ധർ. കഴിഞ്ഞ രണ്ടാഴ്‌ചയായി വലിയ രീതിയിലാണ് രാജ്യത്ത് കോവിഡ് വ്യാപനം ഉയരുന്നത്. ഇതോടെയാണ് രാജ്യം അഞ്ചാം തരംഗത്തിലേക്ക് കടന്നിരിക്കാമെന്ന് ആരോഗ്യ വിദഗ്‌ധർ സൂചിപ്പിക്കുന്നത്.
നിലവിൽ ദക്ഷിണാഫ്രിക്കയിൽ ഒമൈക്രോണിന്റെ ബിഎ 4, ബിഎ 5 എന്നീ വകഭേദങ്ങളാണ് പടർന്നു പിടിക്കുന്നത്. പ്രതിദിനം രോഗം സ്‌ഥിരീകരിക്കുന്നവരുടെ എണ്ണത്തിൽ വലിയ വർധന ഉണ്ടാകുന്നുണ്ട്. കഴിഞ്ഞ ജനുവരിയിലാണ് രാജ്യത്ത് നാലാം തരംഗം അവസാനിച്ചത്. കൂടാതെ ആഫ്രിക്കൻ ഭൂഖണ്ഡത്തിൽ ഏറ്റവും കൂടുതൽ കോവിഡ് കേസുകളും മരണങ്ങളും റിപ്പോർട് ചെയ്‌തതും ദക്ഷിണാഫ്രിക്കയിലാണ്.
അതേസമയം തന്നെ ചൈനയിലും കോവിഡ് കേസുകൾ കുതിച്ചുയരുകയാണ്. വ്യാഴാഴ്‌ച മാത്രം ചൈനയിൽ റിപ്പോർട് ചെയ്‌തത് 15,688 കേസുകളാണ്. ബെയ്‌ജിംഗ്, ഷാങ്ഹായ് മുതലായ നഗരങ്ങളിൽ എല്ലാം കോവിഡ് കേസുകൾ ഉയരുന്നതിന്റെ പശ്‌ചാത്തലത്തിൽ കടുത്ത നിയന്ത്രണങ്ങളാണ് ഏർപ്പെടുത്തിയിരിക്കുന്നത്. ഷാങ്ഹായിൽ കഴിഞ്ഞ ഒരു മാസത്തിലേറെയായി ലോക്ക്ഡൗൺ തുടരുകയാണ്.
Read also: ശേഷിക്കുന്നത് കുറച്ചു ദിവസത്തേക്ക് മാത്രമുള്ള കൽക്കരി; ഡെൽഹിയിൽ വൈദ്യുത പ്രതിസന്ധി രൂക്ഷമാകുന്നു
