ന്യൂഡെൽഹി: രാജ്യതലസ്‌ഥാനത്ത് കൽക്കരി ക്ഷാമം രൂക്ഷമാകുന്നു. ഡെൽഹിയിലെ പവർ സ്‌റ്റേഷനുകളിൽ ഇനി കുറച്ചു ദിവസത്തേക്ക് കൂടിയുള്ള കൽക്കരി മാത്രമാണ് ബാക്കിയുള്ളതെന്ന് അധികൃതർ വ്യക്‌തമാക്കി. അതിനാൽ തന്നെ പവർ സ്‌റ്റേഷനുകളിൽ നിന്നുള്ള വൈദ്യുതി വിതരണം മുടങ്ങുമെന്നും മുന്നറിയിപ്പ് നൽകിയിട്ടുണ്ട്. നിലവിലെ സാഹചര്യം കണക്കിലെടുത്ത് കേന്ദ്രം കൽക്കരി ലഭ്യത ഉറപ്പ് വരുത്തണമെന്നും അധികൃതർ അറിയിച്ചു.
കൽക്കരി ക്ഷാമം രൂക്ഷമായതിന് പിന്നാലെ വൈദ്യുതി ഉൽപാദനം കുറഞ്ഞതോടെ മെട്രോ സ്‌റ്റേഷന്‍, ആശുപത്രികൾ തുടങ്ങിയിടങ്ങളിൽ പ്രവർത്തനം തടസപ്പെടുമെന്ന് നേരത്തെ ഡെൽഹി സർക്കാർ വ്യക്‌തമാക്കിയിരുന്നു. നിലവിൽ ഡെൽഹിയിലെ വൈദ്യുതി പ്രതിസന്ധിയുടെ കാരണം ദാദ്രി ll, ഉഞ്ചഹാർ പവർ സ്‌റ്റേഷനുകളിൽ നിന്നുള്ള വൈദ്യുതി വിതരണം തടസപ്പെട്ടതാണ്. ഡെൽഹിക്കാവശ്യമായ 25 മുതൽ 30 ശതമാനം വരെ വൈദ്യുതി ഈ പവർ സ്‌റ്റേഷനുകളിൽ നിന്നാണ് ലഭിക്കുന്നത്.
ഡെൽഹിയിലെ ദാദ്രി ll, ഉഞ്ചഹാർ, കഹൽഗോൺ, ഫരക്ക, ജഹജർ എന്നീ പവർ സ്‌റ്റേഷനുകളിലെല്ലാം നിലവിൽ കൽക്കരി ക്ഷാമം രൂക്ഷമാണ്. അതിനാൽ തന്നെ ഇവിടങ്ങളിൽ നിന്നുള്ള വൈദ്യുതി ഉൽപാദനവും വലിയ രീതിയിൽ കുറഞ്ഞിട്ടുണ്ട്.
Read also: ശക്‌തമായ മഴക്ക് സാധ്യത; സംസ്‌ഥാനത്ത് വിവിധ ജില്ലകളിൽ യെല്ലോ മുന്നറിയിപ്പ്
