‘സൂഫിയും സുജാതയും’ എന്ന ചിത്രത്തിലൂടെ മലയാളി പ്രേക്ഷകർക്ക് പ്രിയങ്കരനായ ദേവ് മോഹൻ ഇനി സമന്തയുടെ നായകനാകും. തെന്നിന്ത്യൻ താരം സമന്ത നായികയായി എത്തുന്ന ‘ശാകുന്തളം’ എന്ന പുതിയ ചിത്രത്തിലാണ് ദേവ് മോഹൻ നായകനായി എത്തുന്നത്. പുരാണകഥയെ ആസ്‌പദമാക്കി സംവിധായകനും തിരക്കഥാകൃത്തുമായ ഗുണശേഖർ ആണ് ചിത്രം സംവിധാനം ചെയ്യുന്നത്.
ശകുന്തളയായാണ് ചിത്രത്തിൽ സമന്ത വേഷമിടുന്നത്. ശകുന്തളയുടെ വീക്ഷണത്തിൽ നിന്നുകൊണ്ടാണ് ശാകുന്തളം സംസാരിക്കുന്നത്. ചിത്രത്തിന്റെ ഷൂട്ടിംഗ് ഉടൻ തന്നെ ആരംഭിക്കുമെന്നാണ് അണിയറപ്രവർത്തകർ വ്യക്‌തമാക്കുന്നത്‌. കാളിദാസന്റെ ഇതിഹാസ പ്രണയകഥയാണ് ശാകുന്തളം. ശകുന്തളയുടെ വീക്ഷണത്തിൽ നിന്നും കഥ പറയുമ്പോൾ ചിത്രം കൂടുതൽ വ്യത്യസ്‌തമായിരിക്കുമെന്ന് പ്രേക്ഷകർ ഒന്നടങ്കം പ്രതീക്ഷിക്കുന്നുണ്ട്.
‘സൂഫിയും സുജാതയും’ എന്ന ചിത്രത്തിൽ സൂഫി എന്ന കഥാപാത്രത്തെ അവതരിപ്പിച്ച താരമാണ് ദേവ് മോഹൻ. ചിത്രത്തിലെ ദേവിന്റെ പ്രകടനം പ്രേക്ഷകർ ഒന്നടങ്കം ആസ്വദിച്ചിരുന്നു. തുടർന്നാണ് ഇപ്പോൾ തെന്നിന്ത്യയിലെ തന്നെ മികച്ച നായികയോടൊപ്പം സിനിമ ചെയ്യാൻ ദേവിന് അവസരം ഒരുങ്ങിയത്. വിജയ് ബാബുവിന്റെ നിര്‍മ്മാണത്തിൽ നരണിപ്പുഴ ഷാനവാസ് സംവിധാനം ചെയ്‌ത ചിത്രം ലോക്ക്ഡൗണില്‍ ഒടിടിയിൽ എത്തിയ ആദ്യ മലയാള ചിത്രമായിരുന്നു.
Read also : ത്രില്ലടിപ്പിച്ച് ‘കള’ ടീസർ; ചിത്രം ഉടൻ തീയേറ്ററുകളിലേക്ക്
