തിരുവനന്തപുരം: കോവിഡ് കാലത്തെ സുരക്ഷിത യാത്ര മുൻനിർത്തി കെഎസ്ആർടിസിയുടെ ‘എന്റെ കെഎസ്ആർടിസി’ മൊബൈൽ റിസർവേഷൻ ആപ്ളിക്കേഷൻ ഈ മാസം 6-ാം തീയതി രാവിലെ 10.30 ന് മുഖ്യമന്ത്രി പിണറായി വിജയൻ പുറത്തിറക്കും. കൂടാതെ, കെഎസ്ആർടിസിയുടെ മറ്റ് പദ്ധതികളായ കെഎസ്ആർടിസി ജനതാ സർവീസ് ലോഗോ, കെഎസ്ആർടിസി ലോജിസ്റ്റിക്സ് ലോഗോ എന്നിവയും മുഖ്യമന്ത്രി പുറത്തിറക്കും.
ദിനംപ്രതി പതിനായിരക്കണക്കിന് യാത്രക്കാരാണ് കെഎസ്ആർടിസിയുടെ ഓൺലൈൻ റിസർവേഷൻ സംവിധാനം ഉപയോഗിച്ച് ടിക്കറ്റ് റിസർവ് ചെയ്ത് യാത്ര ചെയ്യുന്നത്. ഇവരിൽ ഭൂരിഭാഗവും മൊബൈൽ ഫോൺ ഉപയോഗിച്ചാണ് ടിക്കറ്റ് ബുക്ക് ചെയ്യുന്നത്. എങ്കിലും ഇത് വരെ സ്വന്തമായി ഒരു റിസർവേഷൻ ആപ് കെഎസ്ആർടിസിക്ക് ഉണ്ടായിരുന്നില്ല. ഈ സാഹചര്യത്തിലാണ് അഭി ബസ്സുമായി ചേർന്ന് ആൻഡ്രോയിഡ്-ഐഒഎസ് സംവിധാനങ്ങളിൽ ഉപയോഗിക്കാൻ കഴിയുന്ന ‘എന്റെ കെഎസ്ആർടിസി’ ആപ് തയാറാക്കിയതെന്ന് ഗതാഗത വകുപ്പ് മന്ത്രി എ.കെ ശശീന്ദ്രൻ വ്യക്തമാക്കി.