മനാമ: വയറിൽ ഒളിപ്പിച്ചു കടത്താൻ ശ്രമിച്ച മയക്കുമരുന്നുമായി പ്രവാസി ബഹ്‌റൈനിൽ പിടിയിൽ. ബഹ്‌റൈൻ അന്താരാഷ്‌ട്ര വിമാനത്താവളത്തിൽ വച്ചാണ് അധികൃതർ ഇയാളെ പിടികൂടിയത്. 50,000 ദിനാര്‍ (ഒരു കോടിയിലധികം ഇന്ത്യന്‍ രൂപ) വിലവരുന്ന മയക്കുമരുന്നാണ് ഇയാള്‍ കടത്താൻ ശ്രമിച്ചത്. അതേസമയം പിടിയിലായ പ്രവാസിയുടെ വിവരങ്ങൾ ഇതുവരെ അധികൃതർ പുറത്തുവിട്ടിട്ടില്ല.
സംശയകരമായ പെരുമാറ്റം കണ്ട് പന്തികേട് തോന്നിയതോടെയാണ് ഉദ്യോഗസ്‌ഥര്‍ വിമാനത്താവളത്തിൽ വച്ച് പരിശോധന നടത്തിയത്. എക്‌സ്‌റേ പരിശോധന നടത്തിയതോടെയാണ് വയറില്‍ ഒളിപ്പിച്ചു കടത്താൻ ശ്രമിച്ച മയക്കുമരുന്ന് കണ്ടെത്തിയത്. ക്രിസ്‌റ്റല്‍ മെത്ത് എന്ന മയക്കുമരുന്നിന്റെ 39 ഗുളികകളാണ് ഇയാളുടെ ശരീരത്തിലുണ്ടായിരുന്നത്. ഇവയ്‌ക്ക്‌ 300 ഗ്രാം ഭാരമുണ്ടായിരുന്നു എന്നും അധികൃതർ അറിയിച്ചു. നടപടികള്‍ പൂര്‍ത്തിയാക്കിയ ശേഷം ഇയാളെ പിന്നീട് ഹൈ ക്രിമിനല്‍ കോടതിയില്‍ ഹാജരാക്കുമെന്ന് പ്രോസിക്യൂഷന്‍ വ്യക്‌തമാക്കി.
Read also: ഹൈദരാബാദിൽ 12 കോടിയോളം രൂപയുടെ കൊക്കൈൻ പിടികൂടി
