കൊല്ക്കത്ത: ഐഎഫ്എ ഷീല്ഡിലെ ആദ്യ മല്സരത്തിനായി ഗോകുലം കേരള എഫ്സി നാളെ കളത്തിലറങ്ങും. യുണൈറ്റഡ് സ്പോര്ട്സ് ക്ളബ്ബിനെയാണ് ഗോകുലം എഫ്സി നാളെ നേരിടുക. ഉച്ചക്ക് 1.30ന് വെസ്റ്റ് ബംഗാളിലെ കല്യാണി സ്റ്റേഡിയത്തില് വെച്ചാണ് മല്സരം.
കഴിഞ്ഞ വര്ഷം ഡ്യൂറന്ഡ് കപ്പ് വിജയിച്ചതിന്റെ ആത്മവിശ്വാസവുമായി ആണ് ഗോകുലത്തിന്റെ കരുത്തര് ഐഎഫ്എ ഷീല്ഡില് മല്സരിക്കാന് ഇറങ്ങുന്നത്. 123 വര്ഷം പഴക്കമുള്ള ഐഎഫ്എ ഷീല്ഡില് ഇതുവരെയും കേരളത്തില് നിന്നുമുള്ള ഒരു ക്ളബും വിജയിച്ചിട്ടില്ല എന്ന ചരിത്രവും ഇക്കുറി തിരുത്താന് കഴിയുമെന്നാണ് ടീമിന്റെ പ്രതീക്ഷ.
ഇറ്റലിയില് നിന്നുള്ള വിന്സെന്സോ ആല്ബര്ട്ടോ അനിസ് ആണ് ഇത്തവണ ഗോകുലത്തിന്റെ പരിശീലകന്. വിന്സെന്സോ ആല്ബര്ട്ടോയുടെ തന്ത്രങ്ങള് നാളെ കണ്ടറിയേണ്ടത് തന്നെയാണ്. അദ്ദേഹത്തിന്റെ കീഴില് കോഴിക്കോട് നടന്ന പ്രീ-സീസണ് ക്യാമ്പില് നിന്നും തിരഞ്ഞെടുത്ത ടീമാണ് കൊല്ക്കത്തയില് മാറ്റുരക്കുക. ഈ മാസം രണ്ടിനാണ് താരങ്ങള് മല്സരത്തിനായി കൊല്ക്കത്തയില് എത്തിയത്.
ഈ സീസണിലെ തങ്ങളുടെ ആദ്യ മല്സരമാണ് നടക്കുന്നതെന്നും പരമാവധി തയാറെടുപ്പുകള് നടത്തിയിട്ടുണ്ടെന്നും വിന്സെന്സോ പറഞ്ഞു. കൂടാതെ ഐഎഫ്എ ഷീല്ഡില് ജയം മാത്രമാണ് ലക്ഷ്യമെന്ന് പറഞ്ഞ അദ്ദേഹം ഐഎഫ്എ ഷീല്ഡ് കഴിഞ്ഞാല് ടീം ഐ ലീഗിനായി കൊല്ക്കത്തയില് തുടരുമെന്നും കൂട്ടിച്ചേര്ത്തു.
Read Also: ‘നമ്മുടെ വിഷയം കര്ഷകരാണ്, രാഷ്ട്രീയം നോക്കാതെ അവര്ക്കൊപ്പം നില്ക്കൂ’; പിന്തുണയുമായി പ്രകാശ് രാജ്