കൊച്ചി: സംസ്‌ഥാനത്ത് സ്വർണവിലയിൽ വീണ്ടും ഇടിവ്. ഇന്ന് പവന് 200 രൂപയും ഗ്രാമിന് 25 രൂപയും ആണ് കുറഞ്ഞത്. പവന് 37,360 രൂപയും ഗ്രാമിന് 4,670 രൂപയുമാണ് ഇന്നത്തെ സ്വർണവില. രണ്ടു ദിവസം 37,560 രൂപയിൽ തുടർന്ന ശേഷമാണ് സ്വർണവില വീണ്ടും കുറഞ്ഞത്. ഒക്‌ടോബർ 14നാണ് സ്വർണവില 240 രൂപ കുറഞ്ഞ് 37,560ൽ എത്തിയത്.
അന്താരാഷ്‌ട്ര സ്വർണവിലയിൽ കഴിഞ്ഞ ദിവസം നേരിയ ഇടിവ് റിപ്പോർട്ട് ചെയ്‌തു. കമ്മോഡിറ്റി വിപണിയിൽ ട്രോയ് ഔൺസിന് (31.1 ഗ്രാം) 1,904 ഡോളറാണ് നിലവിലെ നിരക്ക്. രാജ്യാന്തര സ്വർണ നിരക്ക് ഇപ്പോഴും 1,900 ഡോളറിന് മുകളിൽ തുടരുന്നത് വിപണിയിൽ ആശങ്ക വർദ്ധിപ്പിക്കുന്നുണ്ട്. യുഎസ് ഉത്തേജന പാക്കേജ് സംബന്ധിച്ച് അനിശ്‌ചിതത്വം നിലനിൽക്കുന്നതും ഡോളർ കരുത്താർജിച്ചതും ആണ് ആഗോള വിപണിയിൽ സ്വർണവില കുറയാനിടയാക്കിയത്.
