വയനാട് : കോവിഡ് വ്യാപനം രൂക്ഷമായി തുടരുന്ന സാഹചര്യത്തിൽ ഗൂഡല്ലൂരിൽ പ്രവർത്തിച്ചിരുന്ന തേയില ഫാക്ടറികൾ അടപ്പിച്ചു. കണ്ടെയ്ൻമെന്റ് സോണുകളായ പ്രദേശങ്ങളിൽ നിന്നും ആളുകൾ ഫാക്ടറിയിൽ ജോലിക്കായി എത്തുന്നത് ശ്രദ്ധയിൽ പെട്ടതോടെയാണ് നടപടി സ്വീകരിച്ചത്. കളക്ടറുടെ നിർദ്ദേശത്തെ തുടർന്ന് ഗൂഡല്ലൂർ നഗരസഭാ കമ്മീഷണർ ഭാസ്കരൻ നടത്തിയ പരിശോധനക്ക് ശേഷമാണ് തേയില ഫാക്ടറികൾ അടച്ചിടാൻ അധികൃതർ നിർദ്ദേശം നൽകിയത്.
രോഗവ്യാപനം ഉയരുന്നതിനാൽ സർക്കാർ തേയില തോട്ടങ്ങളിലെ ഫാക്ടറികൾ നേരത്തെ തന്നെ അടച്ചിരുന്നു. നിലവിൽ 14 ദിവസത്തേക്കാണ് ഫാക്ടറികൾ അടച്ചിടാൻ നിർദ്ദേശം നൽകിയിരിക്കുന്നത്. അതേസമയം ഫാക്ടറികൾ അടച്ചിടുന്നതോടെ വിളവെടുക്കാറായ തേയില കൊളുന്തുകൾ വെട്ടി തോട്ടത്തിൽ തന്നെ ഉപേക്ഷിക്കേണ്ട സ്ഥിതിയിലാണ് കർഷകർ.
ഫാക്ടറികൾ അടച്ചിടുന്നതോടെ ചെറുകിട തേയില കർഷകരും, തൊഴിലാളികളും പ്രതിസന്ധിയിലാകും. വളപ്രയോഗം നടത്തി തേയില കൊളുന്തുകൾ വിളവെടുപ്പിന് പാകമായ സാഹചര്യത്തിലാണ് ഫാക്ടറികൾ അടച്ചിടാൻ നിർദ്ദേശം നൽകിയത്.
Read also : യുറോ സൗഹൃദ മൽസരങ്ങൾ; ഫ്രാൻസിനും ഇംഗ്ളണ്ടിനും ജയം