2020ല് തന്നെ സ്വാധീനിച്ച വനിതകളില് ഷഹീന് ബാഗ് സമരനായിക ബില്കീസ് ബാനുവുമുണ്ടെന്ന് ഹോളിവുഡ് നടി ഗാല് ഗാഡോട്ട്. തന്റെ ഇൻസ്റ്റഗ്രാം അക്കൗണ്ടിലൂടെ ബില്കീസ് ബാനുവിന്റെ ചിത്രം പങ്കുവച്ചുകൊണ്ടാണ് നടിയുടെ പ്രസ്താവന. പോയ വര്ഷം തന്നെ സ്വാധീനിച്ച 10 സ്ത്രീകളിലൊന്നായാണ് ഗാല് ഗാഡോട്ട് ഷഹീന് ബാഗ് ദാദിയെ ഉള്പ്പെടുത്തിയിരിക്കുന്നത്.
‘2020നോട് വിടപറയുമ്പോള് എന്റെ വണ്ടര് വുമണ് ആയി കുടുംബത്തിലുള്ളവരും നേരിട്ട് പരിചയമുള്ളവരും മുതല് ഇതുവരെ നേരിട്ട് കണ്ടിട്ടില്ലാത്ത, എന്നാല് തനിക്ക് പ്രചോദനം തന്ന സ്ത്രീകളുടെയും ചിത്രങ്ങള് പങ്കുവെക്കുന്നു. ഇവരെ ഭാവിയില് കണ്ടുമുട്ടണമെന്ന് ആഗ്രഹിക്കുന്നു’- ഗാഡോട്ട് കുറിച്ചു. ന്യൂസീലന്റ് പ്രധാനമന്ത്രി ജസീന്ത ആര്ഡെന്, വണ്ടര് വുമണ് സംവിധായിക പാറ്റി ജെന്കിസ്, യുഎസ് വൈസ് പ്രസിഡന്റായി തെരഞ്ഞെടുക്കപ്പെട്ട കമല ഹാരിസ്, ഫൈസര് വാക്സിന് ഗവേഷണത്തിന് നേതൃത്വം നല്കിയ കാതറിന് ജാന്സണ് എന്നിവരും പട്ടികയിലുണ്ട്.
View this post on Instagram
കഴിഞ്ഞ ഡിസംബറിലാണ് ഗാല് ഗാഡോട്ടിന്റെ വണ്ടര് വുമണ് 1984 റിലീസായത്. 2017ല് പുറത്തിറങ്ങിയ ചിത്രത്തിന്റെ രണ്ടാം ഭാഗമാണ് ഇത്. ചിത്രത്തിന്റെ മൂന്നാം ഭാഗത്തിന്റെ പ്രവര്ത്തനങ്ങള് തുടങ്ങിയിട്ടുണ്ട്.