തിരുവനന്തപുരം: കോവിഡ് വ്യാപനത്തിൽ നിലവിൽ ആശങ്കപ്പെടേണ്ട സാഹചര്യമില്ലെന്ന് ഐഎംഎ സംസ്‌ഥാന പ്രസിഡണ്ട് ഡോ.സുൾഫിക്കർ നൂഹു. നിലവിലെ തരംഗം ശക്‌തി കുറഞ്ഞതാണെന്നും ആർജിത പ്രതിരോധ ശേഷി ഗുണം ചെയ്യുമെന്നും ഐഎംഎ സംസ്‌ഥാന പ്രസിഡണ്ട് സ്വകാര്യ വാർത്താ ചാനലിനോട് വ്യക്‌തമാക്കി.
അതേസമയം കോവിഡ് വ്യാപനം പ്രതീക്ഷിച്ചതാണെന്നും അദ്ദേഹം പറഞ്ഞു. സംസ്‌ഥാനത്ത് ജാഗ്രതയും മുൻകരുതലും തുടരണമെന്നും ഐഎംഎ ഓർമിപ്പിച്ചു. പ്രായമായവരും രോഗികളും ജാഗ്രത പുലർത്തണം. സംസ്‌ഥാനത്ത് കോവിഡ് കണക്കുകൾ ഉയരുന്ന സാഹചര്യത്തിൽ ഐഎംഎ സർക്കാരിന് വിവിധ നിർദേശങ്ങൾ നൽകിയിട്ടുണ്ട്.
സംസ്‌ഥാനത്ത് കൂടുതൽ വൈറോളജി ഇൻസ്‌റ്റിറ്റ്യൂട്ടുകൾ പ്രവർത്തന സജ്‌ജമാക്കണമെന്ന് ഐഎംഎ പറഞ്ഞു. മറ്റ് വകഭേദങ്ങൾ ഉണ്ടോയെന്നറിയാൻ ജനിതക ശ്രേണീകരണം ശക്‌തിപ്പെടുത്തണം. സർക്കാർ സ്വകാര്യ ആശുപത്രികളിൽ കോവിഡ് ചികിൽസാ സംവിധാനം ഉറപ്പുവരുത്തണമെന്നും ഐഎംഎ വ്യക്‌തമാക്കി.
