ജോജു ജോർജിനെ നായകനാക്കി നവാഗതനായ സന്‍ഫീര്‍ കെ സംവിധാനം ചെയ്യുന്ന ‘പീസ്’ പായ്‌ക്കപ്പ് പറഞ്ഞു. മലയാളം, തമിഴ്‌, തെലുങ്ക്‌ ഹിന്ദി ഭാഷകളിൽ ഒരുക്കുന്ന ‘പീസ്’ ഒരു സറ്റയർ മുവീയാണ്.
കാർലോസ് എന്ന ഡെലിവറി പാർട്‌ണറുടെ ജീവിതവും ഈ ജീവിതത്തെ ചുറ്റിപ്പറ്റി വികസിക്കുന്ന ചില സംഭവങ്ങളും ആക്ഷേപ ഹാസ്യത്തിലൂടെ പ്രേക്ഷകനെ ത്രില്ലടിപ്പിക്കുന്ന രീതിയിൽ അവതരിപ്പിക്കുന്ന ചിത്രമാണ് ‘പീസ്’ എന്ന് സംവിധായകൻ പറഞ്ഞു.
മൂന്ന് ഷെഡ്യൂളുകളിലായി 75 ദിവസങ്ങൾ കൊണ്ടാണ്‌ ‘പീസ്’ ചിത്രീകരണം പൂർത്തീകരിച്ചത്‌. തൊടുപുഴ, എറണാകുളം, കോട്ടയം എന്നിവിടങ്ങളിലായി, കോവിഡ് മാനദണ്ഢങ്ങൾ പാലിച്ചുകൊണ്ടാണ് ഷൂട്ടിംഗ് നടന്നത്‌. ചിത്രീകരണവേളയിലുള്ള ജോജുവിൻ്റെ ബൈക്കഭ്യാസപ്രകടനം സോഷ്യൽ മീഡിയയിൽ വൈറലായിരുന്നു.
സിദ്ദീഖ്, ആശ ശരത്ത്, അർജുൻ സിങ്, വിജിലേഷ്, ഷാലു റഹീം, രമ്യാ നമ്പീശൻ, അനില്‍ നെടുമങ്ങാട്, അതിഥി രവി,മാമുക്കോയ, പോളി വിൽസൺ തുടങ്ങിയവരും ‘പീസ്’ൽ പ്രധാന കഥാപാത്രങ്ങളെ അവതരിപ്പിക്കുന്നു. സഫര്‍ സനല്‍, രമേഷ് ഗിരിജ എന്നിവര്‍ ചേർന്ന് തിരക്കഥ ഒരുക്കുന്ന ചിത്രം നിര്‍മ്മിക്കുന്നത് സ്ക്രിപ്റ്റ് ഡോക്‌ടർ പിക്‌ചേഴ്‌സിന്റെ ബാനറിൽ ദയാപരൻ ആണ്. ബാദുഷയാണ് പ്രൊജക്റ്റ് ഡിസൈനർ.
ജുബൈർ മുഹമ്മദ് സംഗീത സംവിധാനം നിർവഹിച്ചിരിക്കുന്ന ചിത്രത്തിന്റെ ഗാനരചന അൻവർ അലിയും സൻഫീർ.കെ യും ചേർന്നാണ് നിർവഹിച്ചിരിക്കുന്നത്‌. പിആർഒ പി ശിവപ്രസാദ്, സ്‌റ്റിൽസ് ജിതിൻ മധു തുടങ്ങിയവരാണ് അണിയറ പ്രവർത്തകർ.
