തിരുവനന്തപുരം: നിയമസഭാ തിരഞ്ഞെടുപ്പിൽ നേരിട്ട കനത്ത തിരിച്ചടിക്ക് പിന്നാലെ കെപിസിസി പ്രസിഡണ്ട് മുല്ലപ്പള്ളി രാമചന്ദ്രനെതിരെ കോണ്ഗ്രസില് പടയൊരുങ്ങുന്നു. പരാജയത്തിന്റെ ഉത്തരവാദിത്തത്തില് നിന്ന് കെപിസിസി പ്രസിഡണ്ടിന് മാറി നില്ക്കാൻ സാധിക്കില്ലെന്ന് പേരാവൂര് എംഎല്എ സണ്ണി ജോസഫ് പറഞ്ഞു.
പരാജയത്തില് നിന്ന് പാഠം പഠിച്ച് ശൈലി മാറ്റാന് നേതൃത്വം തയ്യാറാകണം. കെപിസിസി പ്രസിഡണ്ട് സ്ഥാനത്തേക്ക് കെ സുധാകരന് വരണമെന്നാണ് പ്രവര്ത്തകരുടെ വികാരം. കോണ്ഗ്രസില് ജനങ്ങളെ ആകര്ഷിക്കാന് കഴിവുള്ള നേതാക്കൻമാരിൽ ഒരാളാണ് കെ സുധാകരന്. ജനാധിപത്യപരമായാണ് അദ്ദേഹത്തിന്റെ പെരുമാറ്റവും നിലപാടുകളും. സുധാകരന്റെ വരവിന് ഗ്രൂപ്പ് തടസമാവില്ലെന്നാണ് കരുതുന്നതെന്നും സണ്ണി ജോസഫ് പറഞ്ഞു.
അതേസമയം, കെപിസിസി പ്രസിഡണ്ട് സ്ഥാനത്ത് നിന്ന് സ്വയം മാറില്ലെന്ന് മുല്ലപ്പള്ളി രാമചന്ദ്രന് അറിയിച്ചിട്ടുണ്ട്. തോല്വിയുടെ ഉത്തരവാദിത്വം ഏറ്റെടുത്ത മുല്ലപ്പള്ളി ഇക്കാര്യത്തിൽ ഹൈക്കമാന്ഡിന്റെ തീരുമാനം വരട്ടെയെന്ന നിലപാടിലാണ്.
Read also: ഇരുട്ടടി തുടരുന്നു; ഇന്ധനവില വീണ്ടും കൂട്ടി