കൊണ്ടോട്ടി: കരിപ്പൂര് വിമാനാപകടത്തില് പരിക്കേറ്റ് ചികിത്സയിലായിരുന്ന യാത്രക്കാരന് മരിച്ചു. മലപ്പുറം തിരുവാലി സ്വദേശിയായ അരവിന്ദാക്ഷനാണ് (67) മരിച്ചത്. അപകടത്തില് സാരമായി പരിക്കേറ്റ ഇദ്ദേഹം കൊണ്ടോട്ടിയിലെ സ്വകാര്യ ആശുപത്രിയിലെ തീവ്രപരിചരണവിഭാഗത്തില് ചികിത്സയിലായിരുന്നു. ഹൃദയാഘാതമാണ് മരണകാരണമെന്ന് ആശുപത്രി അധികൃതര് അറിയിച്ചു.
വിമാനത്തില് ഇദ്ദേഹത്തിനൊപ്പം യാത്രചെയ്തിരുന്ന ഭാര്യയും ചികിത്സയില് തുടരുകയാണ്. ഇതോടെ അപകടത്തില് മരണപ്പെട്ടവരുടെ എണ്ണം 18 ആയി.
ആഗസ്റ്റ് 7നാണ് കരിപ്പൂരില് എയര് ഇന്ത്യ വിമാനം ലാന്ഡിംഗിനിടെ നിയന്ത്രണം തെറ്റി താഴ്ചയിലേക്ക് വീണത്. 18 പേര് മരണപ്പെടുകയും നൂറിലേറെ യാത്രക്കാര്ക്ക് പരിക്കേല്ക്കുകയും ചെയ്ത അപകടത്തിനെക്കുറിച്ചുള്ള അന്വേഷണം പുരോഗമിക്കുകയാണ്. എയര്ക്രാഫ്റ്റ് ആക്സിഡന്റ് ഇന്വെസ്റ്റിഗേഷന് ബ്യുറോയ്ക്കാണ് അന്വേഷണചുമതല.