കല്‍പ്പറ്റ: നെല്‍വയല്‍ ഉടമകള്‍ക്കുള്ള സംസ്ഥാന സര്‍ക്കാറിന്റെ റോയല്‍റ്റിക്കും കാര്‍ഷിക വിള ഇന്‍ഷുറന്‍സിനുമുള്ള അപേക്ഷകള്‍ ക്ഷണിച്ചുവെന്ന് കല്‍പ്പറ്റ കൃഷി അസിസ്റ്റന്റ് ഡയറക്‌ടർ അറിയിച്ചു. താത്പര്യമുള്ള കര്‍ഷകര്‍ക്ക് സുഭിക്ഷ കേരളം പോര്‍ട്ടലില്‍ അപേക്ഷിക്കാവുന്നതാണ്. യൂസര്‍ നെയിമും പാസ്സ്‌വേര്‍ഡും ഉപയോഗിച്ച് രജിസ്റ്റര്‍ ചെയ്‌ത കര്‍ഷകര്‍ക്ക് സര്‍വീസസ് ഓപ്ഷനിലൂടെ വിവിധ പദ്ധതികള്‍ക്ക് അപേക്ഷിക്കാം.
നിലവില്‍ നെല്‍കൃഷി ചെയ്യുന്ന വയലുകളുടെ ഉടമസ്ഥര്‍ക്ക് 2000 രൂപ നിരക്കില്‍ റോയല്‍റ്റി ലഭിക്കും. ഈ വര്‍ഷം നികുതി അടച്ചതിന്റെ രസീത് അല്ലെങ്കില്‍ കൈവശ സര്‍ട്ടിഫിക്കറ്റ് , ആധാര്‍ കാര്‍ഡ് അല്ലെങ്കില്‍ വോട്ടര്‍ ഐഡി കോപ്പി, ബാങ്ക് പാസ്ബുക്ക് കോപ്പി അല്ലെങ്കില്‍ റദ്ദാക്കിയ ചെക്ക് ലീഫ് കോപ്പി ഉള്‍പ്പെടെ അപ്‌ലോഡ് ചെയ്യുന്ന കര്‍ഷകര്‍ക്ക് ഒരു ഹെക്‌ടറിന് 2000 രൂപ നിരക്കില്‍ ഈ വര്‍ഷം മുതല്‍ റോയല്‍റ്റി ബാങ്ക് അക്കൗണ്ടുകളിലേക്ക് ട്രാൻസ്‌ഫർ ക്രെഡിറ്റ് ചെയ്യാം.
കാര്‍ഷിക വിളകള്‍ ഇന്‍ഷുറന്‍സ് ചെയ്യുന്നതും ഇനി ഓണ്‍ലൈന്‍ വഴിയാണ്. വിള ഇന്‍ഷുറന്‍സ് ചെയ്യാന്‍ ആഗ്രഹിക്കുന്ന കര്‍ഷകരും കാര്‍ഷിക ഗ്രൂപ്പുകളും, ആവശ്യമായ രേഖകള്‍ അപ്‌ലോഡ് ചെയ്‌ത്‌ സുഭിക്ഷകേരളം വെബ്‌സൈറ്റില്‍ രജിസ്റ്റര്‍ ചെയ്യാം. കാര്‍ഷിക ഗ്രൂപ്പുകള്‍ രജിസ്‌ട്രേഷന്‍ നമ്പറും സൈറ്റില്‍ അപ്‌ലോഡ് ചെയ്യണം. തദ്ദേശ സ്വയം ഭരണ സ്ഥാപനങ്ങളുടെ നെല്‍കൃഷി കൂലി ചിലവിനുള്ള സബ്‌സിഡി ആനുകൂല്യങ്ങള്‍ ലഭിക്കുന്നതിനും വിള ഇന്‍ഷുറന്‍സ് നിര്‍ബന്ധമാണ്, അതുകൊണ്ട് കര്‍ഷകര്‍ എത്രയും വേഗം വിളകള്‍ ഇന്‍ഷുറന്‍സ് ചെയ്യണമെന്നും കൃഷി അസിസ്റ്റന്റ് ഡയറക്‌ടർ അറിയിച്ചു.
Read also: മത്സ്യ സമൃദ്ധി; ഉൾനാടൻ മത്സ്യകൃഷിയിൽ പുത്തൻ പദ്ധതിയുമായി മുക്കം നഗരസഭ
