മുംബൈ: ബോളിവുഡ് നടി കങ്കണ റണൗട്ടിന്റെ ഓഫിസ് കെട്ടിടം കോര്‍പ്പറേഷന്‍ അധികൃതര്‍ പൊളിച്ചു നീക്കി. താരത്തിന്റെ മുംബൈയിലെ ബംഗ്ലാവിലെ ഓഫിസ് കെട്ടിടമാണ് ഉച്ചയോടെ ബുള്‍ഡോസറുകളുമായി എത്തി കോര്‍പ്പറേഷന്‍ അധികൃതര്‍ പൊളിച്ചു നീക്കിയത്.
കെട്ടിടം പൊളിച്ച് മാറ്റാനുള്ള നീക്കത്തിനെതിരെ കങ്കണ സമര്‍പ്പിച്ച ഹരജി ഹൈക്കോടതി പന്ത്രണ്ടരക്ക് പരിഗണിക്കാനിരിക്കെയാണ് കോര്‍പ്പറേഷന്‍ നടപടികളുമായി മുന്നോട്ടു പോയത്. ശിവസേന നേതാക്കളും കങ്കണയും തമ്മിലുള്ള വാക്‌പോര് മൂര്‍ച്ഛിക്കുന്നതിനിടെ ആണ് ശിവസേനയുടെ നിയന്ത്രണത്തിലുള്ള കോര്‍പ്പറേഷന്റെ പ്രതികാര നടപടി. കെട്ടിടം പൊളിച്ച് നീക്കിയതുമായി ബന്ധപ്പെട്ട് കങ്കണ ട്വിറ്ററില്‍ തന്റെ പ്രതിഷേധം രേഖപ്പെടുത്തുകയും ചെയ്തിട്ടുണ്ട്. ‘ജനാധിപത്യത്തിന്റെ മരണം’ എന്ന ഹാഷ്ടാഗോട് കൂടി താരം പൊളിച്ച് മാറ്റുന്നതിന്റെ ദൃശ്യങ്ങളും പങ്കുവെച്ചിട്ടുണ്ട്.
I am never wrong and my enemies prove again and again this is why my Mumbai is POK now #deathofdemocracy ? pic.twitter.com/bWHyEtz7Qy
— Kangana Ranaut (@KanganaTeam) September 9, 2020
അനധികൃത നിര്‍മ്മാണം കാട്ടി കോര്‍പ്പറേഷന്‍ നല്‍കിയ നോട്ടീസിന് കങ്കണ നല്‍കിയ മറുപടി തൃപ്തികരമല്ലെന്ന് ചൂണ്ടിക്കാണിച്ചാണ് കോര്‍പ്പറേഷന്‍ ഓഫീസ് കെട്ടിടം പൊളിച്ചത്. ഇതേസമയം, ഹിമാചല്‍ പ്രദേശിലുള്ള കങ്കണ മുംബൈയിലേക്ക് തിരിച്ചതായാണ് വിവരം. ഇതിന് പുറമെ കങ്കണ മയക്കുമരുന്ന് ഉപയോഗിക്കുന്നുണ്ടോ എന്ന് അന്വേഷിക്കാനും മഹാരാഷ്ട്ര ആഭ്യന്തര മന്ത്രി അനില്‍ ദേശ് മുഖ് ഉത്തരവിട്ടിട്ടുണ്ട്.
