കുഞ്ചാക്കോ ബോബനെ നായകനാക്കി രതീഷ് ബാലകൃഷ്ണൻ പൊതുവാൾ സംവിധാനം ചെയ്യുന്ന ‘ന്നാ താന് കേസ് കൊട്’ എന്ന പുതിയ ചിത്രത്തിന്റെ ടീസര് പുറത്തുവിട്ടു. 123 മ്യൂസിക്സിന്റെ യൂട്യൂബ് ചാനലിലൂടെ കഴിഞ്ഞ ദിവസം റിലീസ് ചെയ്ത ടീസറിന് മികച്ച പ്രതികരണമാണ് ലഭിക്കുന്നത്.
‘ആൻഡ്രോയിഡ് കുഞ്ഞപ്പൻ’ എന്ന സിനിമയ്ക്ക് ശേഷം രതീഷ് ബാലകൃഷ്ണൻ സംവിധാനം ചെയ്യുന്ന ചിത്രമാണിത്. ഗായത്രി ശങ്കറാണ് ചിത്രത്തിൽ നായികയായി എത്തുന്നത്. ‘നടുവിലെ കൊഞ്ചം പക്കത്തെ കാണോം’, ‘സൂപ്പര് ഡീലക്സ്’, ‘വിക്രം’ എന്നീ തമിഴ് ചിത്രങ്ങളില് വേഷമിട്ട ഗായത്രിയുടെ ആദ്യ മലയാളം സിനിമ കൂടിയാണിത്.
കോടതി പശ്ചാത്തലമാക്കി വ്യത്യസ്തമായ ഒരു കേസിനെ കുറിച്ചായിരിക്കും സിനിമ സംസാരിക്കുന്നതെന്ന് ഉറപ്പ് നൽകുന്നതാണ് ടീസർ. വളരെ വ്യത്യസ്തമായ ഗെറ്റപ്പിലാണ് കുഞ്ചാക്കോ ബോബൻ എത്തുന്നത്. ഓഗസ്റ്റ് 12ന് ചിത്രം റിലീസ് ചെയ്യും.
രാകേഷ് ഹരിദാസ് ഛായാഗ്രാഹണം നിർവഹിക്കുന്ന ചിത്രത്തിൽ കാസർഗോഡ് നിവാസികളായ ഒട്ടേറെ പുതുമുഖങ്ങളും അണിനിരക്കുന്നു. വൈശാഖ് സുഗുണന്റെ വരികൾക്ക് ഡോൺ വിൻസന്റ് ഈണം പകരുന്നു.
Most Read: നടിയെ ആക്രമിച്ച കേസിലെ മെമ്മറി കാര്ഡ് പരിശോധിക്കുമോ? വിധി ഇന്ന്