കൊച്ചി: വിദ്വേഷ പ്രസംഗ കേസിൽ ജാമ്യ ഉപാധി ലംഘിച്ചതിന്റെ പേരിൽ പിസി ജോർജിനെതിരെ നിയമ നടപടിക്ക് ഒരുങ്ങി ഫോർട്ട് പോലീസ്. ചോദ്യം ചെയ്യലിനായി പിസി ജോർജ് ഹാജരാകാത്തത് ജാമ്യ ഉപാധിയുടെ ലംഘനമാണെന്ന് ചൂണ്ടിക്കാട്ടി ഫോർട്ട് പോലീസ് ഹൈക്കോടതിക്ക് റിപ്പോർട് നൽകും.
ഇന്ന് രാവിലെ 11 മണിക്ക് ചോദ്യം ചെയ്യലിനായി ഫോർട്ട് എസി ഓഫിസിൽ ഹാജരാകണം എന്നായിരുന്നു നിർദ്ദേശം. എന്നാൽ ഇന്ന് തൃക്കാക്കരയിൽ എത്തിയ പിസി ബിജെപിയുടെ തിരഞ്ഞെടുപ്പ് പ്രചാരണത്തിൽ പങ്കെടുക്കുകയാണ്. ഇത് ജാമ്യ ഉപാധികളുടെ ലംഘനമാണെന്നാണ് പോലീസ് വാദം. ആരോഗ്യ പ്രശ്‌നങ്ങൾ മൂലം ചോദ്യം ചെയ്യലിന് ഹാജരാകാൻ ആവില്ലെന്നാണ് പിസി ജോർജ് പോലീസിനെ അറിയിച്ചത്.
ചോദ്യം ചെയ്യലുമായി സഹകരിക്കണം എന്നതാണ് ജോർജിന് ജാമ്യം നൽകിക്കൊണ്ട് ഹൈക്കോടതി വ്യക്‌തമാക്കിയിരിക്കുന്നത്. ആരോഗ്യപ്രശ്‌നം മൂലം ഹാജരാകാൻ ആവില്ലെന്ന് അറിയിച്ച പിസി ജോർജ് തൃക്കാക്കരയിൽ തിരഞ്ഞെടുപ്പ് പ്രചാരണത്തിന് എത്തിയെന്നും അദ്ദേഹത്തിന് ആരോഗ്യ പ്രശ്‌നങ്ങൾ ഇല്ലെന്നും ചൂണ്ടിക്കാട്ടിയാവും പോലീസ് കോടതിയെ സമീപിക്കുക.
Most Read: നേപ്പാളിൽ ചെറുവിമാനം കാണാതായി; യാത്രക്കാരിൽ നാല് ഇന്ത്യക്കാരും
