കോട്ടയം: വഴിയിലേക്ക് പൊട്ടിവീണു കിടന്ന വൈദ്യുത കമ്പിയില് നിന്നും യുവാവിനെ രക്ഷിച്ച വളര്ത്തുനായ ഷോക്കേറ്റ് മരിച്ചു. ചാമംപതാല് വാഴപ്പള്ളി വിജയന്റെ മകന് അജേഷാണ് (32) വളര്ത്തുനായയുടെ കൃത്യമായ ഇടപെടലില് അപകടത്തില് നിന്നും രക്ഷപെട്ടത്.
ബുധനാഴ്ച രാവിലെയോടെയായിരുന്നു സംഭവം. അയല്വീട്ടില് നിന്നും പാല് വാങ്ങാനിറങ്ങിയതായിരുന്നു അജേഷും വളര്ത്തുനായ അപ്പൂസും. അജേഷിന് മുന്നേ നടന്ന അപ്പൂസ് ഇടവഴിയില് പൊട്ടിക്കിടന്ന വൈദ്യുത കമ്പിയില് നിന്ന് ഷോക്കേറ്റ് തെറിച്ചു വീണു. രക്ഷിക്കാനായി അജേഷ് ഓടിയെത്തിയെങ്കിലും മുമ്പോട്ട് വിടാതെ നായ കുരച്ചുകൊണ്ട് തടഞ്ഞു. ശേഷം കമ്പി കടിച്ചെടുത്ത് നീക്കിയിട്ടു. കടിച്ചുപിടിച്ച കമ്പിയില് നിന്നും വീണ്ടും ഷോക്കേറ്റ് അപ്പൂസ് മരണത്തിന് കീഴടങ്ങി.
കെ.എസ്.ഇ.ബി ജീവനക്കാരെത്തി വൈദ്യുതിബന്ധം വിച്ഛേദിച്ച ശേഷമാണ് അപ്പൂസിന്റെ ജഡം മാറ്റിയത്. തുടര്ന്ന് വീട്ടുവളപ്പില് സംസ്കരിച്ചു.