പാലക്കാട്: കോവിഡ് നിയന്ത്രണങ്ങളിൽ കൂടുതല് ഇളവുകള് ലഭിച്ച സാഹചര്യത്തിൽ പട്ടാമ്പി നഗരസഭയിൽ പ്രത്യേക യോഗം ചേര്ന്നു. നഗരസഭാ പരിധിയില് സ്വീകരിക്കേണ്ട പ്രതിരോധ നടപടികള് ചര്ച്ച ചെയ്യുന്നതിനാണ് യോഗം ചേര്ന്നത്.
ഇളവുകള് നടപ്പാക്കുമ്പോള് കോവിഡ് വ്യാപനം കൂടാതെ പട്ടാമ്പിയെ സുരക്ഷിത മേഖലയായി തന്നെ നിലനിര്ത്തുന്നതിനും അതോടൊപ്പം പ്രതിരോധ പ്രവര്ത്തനങ്ങളില് വരുത്തേണ്ട ക്രമീകരണങ്ങളെക്കുറിച്ചും യോഗം വിശദമായി ചര്ച്ച നടത്തി. നിയന്ത്രണങ്ങളുമായി ബന്ധപ്പെട്ട കാര്യങ്ങള് വിശദീകരിക്കാന് വെള്ളിയാഴ്ച നഗരസഭാ ഓഫിസില് വ്യാപാരികളുടെ യോഗം വിളിച്ചുചേര്ക്കുന്നുണ്ട്.
അതേസമയം നിര്ദ്ദേശങ്ങള് കര്ശനമായി പാലിക്കപ്പെടുന്നുണ്ടോ എന്ന് ഉറപ്പുവരുത്താന് നഗരസഭ, പോലീസ്, സെക്ടറല് മജിസ്ട്രേറ്റുമാര് എന്നിവരുടെ നേതൃത്വത്തില് സംയുക്ത പരിശോധനകള് നടത്തുമെന്നും അധികൃതർ അറിയിച്ചു.
യോഗത്തിൽ നഗരസഭാ ചെയര്പേഴ്സൺ ഒ ലക്ഷ്മിക്കുട്ടി, വൈസ് ചെയര്മാന് ടിപി ഷാജി, തഹസില്ദാര് ടിപി കിഷോര്, നഗരസഭാ സെക്രട്ടറി ഇ നാസിം, നഗരസഭാ സ്ഥിരംസമിതി അധ്യക്ഷൻമാരായ കെടി റുഖിയ, പികെ കവിത, സബ് ഇന്സ്പെക്ടര് രാജേഷ്, സെക്ടറല് മജിസ്ട്രേറ്റുമാര്, താലൂക്ക് ആശുപത്രി സൂപ്രണ്ട് എന്നിവര് സന്നിഹിതരായി.
Malabar News: കണ്ണൂരിൽ നിന്ന് യുഎഇയിലേക്കുള്ള വിമാന സർവീസുകൾ പുനരാരംഭിക്കുന്നു