ശ്രീനഗര്‍: ജമ്മു കശ്‍മീരിന്റെ പ്രത്യേക പദവി റദ്ദാക്കിയ നിയമവിരുദ്ധ നടപടിക്കെതിരെ പോരാട്ടം തുടരുമെന്ന് പിഡിപി വ്യക്‌തമാക്കി. പിഡിപിയിലെ മുതിര്‍ന്ന നേതാക്കളുടെ യോഗത്തിലാണ് 370ആം വകുപ്പ് റദ്ദാക്കിയതിനെതിരെയുള്ള നിലപാടില്‍ മാറ്റമില്ലെന്ന് പ്രഖ്യാപിച്ചത്. ശ്രീനഗറിലെ ഫെയര്‍വ്യൂവില്‍ വെച്ച് നടന്ന യോഗത്തില്‍ ജമ്മു കശ്‍മീര്‍ മുന്‍ മുഖ്യമന്ത്രിയും പിഡിപി പ്രസിഡണ്ടുമായ മഹ്ബൂബ മുഫ്‌തി അധ്യക്ഷത വഹിച്ചു. ഒരു വര്‍ഷത്തിലേറെ നീണ്ട വീട്ടുതടങ്കലിനുശേഷം മഹ്ബൂബ സംബന്ധിക്കുന്ന ആദ്യത്തെ യോഗമാണിത്.
Read also: നിതീഷ് കുമാര്‍ അഴിമതിയുടെ ഭീഷ്‌മാചാര്യര്‍; തേജസ്വി യാദവ്
കശ്‍മീരിന്റെ പ്രത്യേക പദവി എടുത്തുകളഞ്ഞ നടപടി ഭരണഘടനാവിരുദ്ധവും അസ്വീകാര്യവുമാണെന്ന് പിഡിപി വക്‌താവ് സുഹൈല്‍ ബുഖാരി അഭിപ്രായപ്പെട്ടു. ഇതിനെതിരെ കശ്‍മീരിലെ ജനങ്ങള്‍ക്കൊപ്പം നിന്നു പോരാടുമെന്നും അദ്ദേഹം പറഞ്ഞു. ഇക്കാര്യത്തില്‍ മഹ്ബൂബ എടുക്കുന്ന നിലപാടിനെ ശക്‌തമായി പിന്തുണക്കുമെന്നും യോഗത്തില്‍ തീരുമാനിച്ചതായി അദ്ദേഹം കൂട്ടിച്ചേര്‍ത്തു.
