കാബൂൾ: അഫ്ഗാനിലെ വനിതാ അവതാരകർ പരിപാടി അവതരിപ്പിക്കുമ്പോൾ മുഖം മറയ്ക്കണമെന്ന ഉത്തരവ് പുറപ്പെടുവിച്ച് താലിബാൻ. ഇക്കാര്യം സ്ഥിരീകരിച്ച് രാജ്യത്തെ ആദ്യ 24 മണിക്കൂർ വാർത്താ ചാനലായ ‘ടോളോ ന്യൂസ്’ ട്വീറ്റ് ചെയ്തു.
പൊതുസ്ഥലങ്ങളിൽ സ്ത്രീകൾ മുഖം മറയ്ക്കണമെന്ന നിർദ്ദേശം വന്നു ദിവസങ്ങൾക്കകമാണ് നിയമം ചാനലുകളിലേക്കും വ്യാപിപ്പിച്ചത്. അതേസമയം താലിബാന്റെ പുതിയ ഉത്തരവിനെ നിരവധി പേർ അപലപിക്കുകയും വനിതാ മാദ്ധ്യമ പ്രവർത്തകർക്ക് പിന്തുണ പ്രഖ്യാപിക്കുകയും
ചെയ്യുന്നുണ്ട്.
സ്ത്രീകളെ സ്ക്രീനിൽ നിന്ന് മാറ്റാനാണ് താലിബാൻ ശ്രമിക്കുന്നതെന്ന് ഐക്യരാഷ്ട്രസഭയിലെ ഗ്ളോബൽ കമ്മ്യൂണിക്കേഷൻസ് അണ്ടർ സെക്രട്ടറി ജനറൽ മെലിസ ഫ്ളെമിങ് ആരോപിച്ചു.
“വിദ്യാസമ്പന്നയായ സ്ത്രീയെ താലിബാൻ ഭയപ്പെടുന്നു. ആദ്യം സ്കൂൾ കുട്ടികളുടെ പഠനം നിർത്തി, ഇപ്പോൾ മാദ്ധ്യമങ്ങളെ ലക്ഷ്യമിടുന്നു. സ്ത്രീകളുടെയും കുട്ടികളുടെയും അവകാശങ്ങളെ മാനിക്കണമെന്ന് താലിബാനോട് അഭ്യർഥിക്കുന്നു” -മെലിസ ട്വീറ്റ് ചെയ്തു.
Read also: ജമ്മുവിൽ തുരങ്കം തകർന്നു; ഒരു മരണം