കോഴിക്കോട്: സംരംഭം നടത്തി പരാജയപ്പെട്ടവർ തലകുനിക്കരുത്; കാരണം വിപണിയെ മുന്നോട്ടു നയിക്കുന്നതിൽ തോൽക്കുന്ന സംരംഭകരും ഉൾപ്പെടുന്നുണ്ട്. ‘മലബാർ ബിസിനസ് ക്ളബ്’ ഗൂഗിൾ മീറ്റ് വഴി ഫെബ്രുവരി 25ന് സംഘടിപ്പിച്ച അംഗങ്ങളുടെ യോഗവുമായി ബന്ധപ്പെട്ട് പുറത്തിറക്കിയ പഠന കുറിപ്പിൽ ക്ളബ്ബിന്റെ സ്ഥാപകാംഗം ഇസഹാഖ് ഈശ്വരമംഗലം പറഞ്ഞു.
ഐബിഎം ഇൻസ്റ്റിറ്റ്യൂട്ട് ഫോർ ബിസിനസ് വാല്യു, ഓക്സ്ഫോർഡ് ഇക്കണോമിക്സ് എന്നിവയുടെ പഠന റിപ്പോർട്ട് പ്രകാരം ഇന്ത്യൻ സ്റ്റാർട്ടപ്പുകളിൽ 90 ശതമാനവും ആരംഭിച്ച് അഞ്ച് വർഷത്തിനുള്ളിൽ പരാജയപ്പെടുന്നു. ബാക്കി വരുന്ന 10ൽ 5% അടുത്ത 5 വർഷം കൊണ്ടും പിൻമാറുന്നുണ്ട് എന്ന യാഥാർഥ്യം ഓർക്കുക. അഥവാ പത്ത് വർഷത്തിനപ്പുറം പിടിച്ചു നിൽക്കുന്ന സംരംഭങ്ങൾ 5 ശതമാനം മാത്രമാണ്.
ഇതിൽ 2 ശതമാനത്തിൽ താഴെ സംരംഭങ്ങളാണ് സുസ്ഥിര വളർച്ചയും അതിജീവന ശേഷിയും കൈവരിക്കുക. ഈ നഗ്ന സത്യം നാമോർക്കണം. തോറ്റ് പിൻമാറുന്ന ഭൂരിപക്ഷം സംരംഭകർ വിപണിയിലിറക്കിയ മൂലധനംകൂടി സുപ്രധാന ഊർജ്ജമാക്കിയാണ് ഏതൊരു വിപണിയും മുന്നോട്ടു ചലിക്കുന്നത്; ‘കൺസൾട്ട്ഫുൾ’ സിഇഒയും ജിസിസി ബിസിനസ് ന്യൂസ് സ്ഥാപകനും മലബാർ ന്യൂസ് ചീഫ് എഡിറ്ററും കൂടിയായ ഇസഹാഖ് ഈശ്വരമംഗലം പഠനകുറിപ്പിൽ ഓർമപ്പെടുത്തി.
സർക്കാരുകളും മറ്റു സംരംഭക ‘പ്രമോട്ടർമാരോ‘ പരാജയപ്പെടുന്നവരുടെ ശതമാനകണക്കോ കഥകളോ നമ്മെ പഠിപ്പിക്കില്ല. കാരണം, പരാജയപ്പെടുന്നവരുടെ പണമാണ് വിപണിയെ മുന്നോട്ടു നയിക്കുന്നതിൽ പ്രധാനഘടകം. അത് കൊണ്ട് കൂടുതൽ കൂടുതൽ സംരംഭകർ വിപണിയിലേക്ക് വന്നുകൊണ്ടേ ഇരിക്കണം. ഇത് പരസ്യം സ്വീകരിക്കുന്ന വിവിധ മാദ്ധ്യമ സ്ഥാപനങ്ങൾ, കൺസൾട്ടന്റുമാർ, സംരംഭക പരിശീലകർ, സാങ്കേതിക രംഗം മുതൽ സർക്കാർവരെ ആഗ്രഹിക്കുന്ന കാര്യമാണ്. അതിനവർ നേട്ടം കൊയ്ത ചെറിയ ശതമാനത്തിന്റെ കഥകൾ ‘ഇരയായി കോർത്ത്’ സമൂഹമെന്ന കടലിൽ ചൂണ്ടയിട്ടുകൊണ്ടേ ഇരിക്കും. അതിൽ പോയി കൊത്തുന്നതിന് മുൻപ് നിരവധി പഠനങ്ങൾ ഓരോ സംരംഭകർക്കും ആവശ്യമുണ്ട്.
നിർഭാഗ്യകരമെന്ന് പറയട്ടെ; ഈ പാഠങ്ങൾ പഠിക്കാൻ പലപ്പോഴും ആശ്രയിക്കുന്നത് തെറ്റായ ഉറവിടെത്തെയാണ്. വിജയകരമായ ഒരു ബിസിനസോ സ്വന്തമായി ഒരു ‘ബ്രാൻഡ് നെയിം’ പോലുമോ സൃഷ്ടിക്കാൻ കഴിയാത്ത സംരംഭക പരിശീലകരെന്ന വിലാസത്തിൽ അധ്വാനിക്കാതെ, വാചക കസർത്ത് കൊണ്ട് ജീവിക്കുന്ന ആളുകളുടെ ഉപദേശം കേട്ടും അടിസ്ഥാനപരമായ യാതൊരു അനുഭവ സമ്പത്തും ആധുനിക പരിജ്ഞാനവും ഇല്ലാത്ത വെറും ‘ബിൽഡപ്പ്’ കൊണ്ട് മാത്രം നിലനിൽക്കുന്ന വിവിധ കൺസൾട്ടന്റുമാരെയും ആശ്രയിച്ചുമാണ് പലരും സംരംഭക ലോകത്തേക്ക് ഇറങ്ങി തിരിക്കുന്നത്. പരാജയത്തിന്റെ അടിസ്ഥാന കാരണങ്ങളിൽ ഒന്നിതാണ്.
ശമ്പളമായും വാടകയായും പലിശയായും ബില്ലുകളായും പരസ്യങ്ങളായും വിപണിയുടെ സകല മേഖലകളെയും മുന്നോട്ടു നയിക്കുന്നതിൽ പ്രധാനപങ്ക് വഹിക്കുന്നവരിൽ തോൽക്കുന്ന ഭൂരിപക്ഷവുമുണ്ട്. ഈ സത്യം മാദ്ധ്യമങ്ങൾക്കും സർക്കാരിനും നന്നായറിയാം. പക്ഷെ, അതിനവർ പ്രാമുഖ്യം കൊടുക്കില്ല. അങ്ങനെ കൊടുത്താൽ പരാജയപ്പെട്ടവരെ സംരക്ഷിക്കാൻ സർക്കാർ ബാധ്യസ്ഥമാകും; ഈശ്വരമംഗലം കൂട്ടിച്ചേർത്തു.
നിലവിലുള്ളവരും പുതുതായി കടന്നു വരുന്നവരും പ്രാദേശിക വികസനത്തിന് സഹായകമാകുന്ന സംരംഭങ്ങൾ കെട്ടിപ്പടുക്കാൻ ശ്രമിക്കണമെന്ന് മലബാർ ബിസിനസ് ക്ളബ് അംഗങ്ങൾ യോഗത്തിൽ അഭിപ്രായപ്പെട്ടു. കോവിഡ് കാലത്തിലെ സാമ്പത്തിക പ്രതിസന്ധികളെ തരണം ചെയ്യാൻ സമയമെടുക്കുമെങ്കിലും നാം അതിജീവിക്കുകതന്നെ ചെയ്യുമെന്നും അംഗങ്ങൾ പറഞ്ഞു. കാർഷിക മേഖലക്ക് നേരിട്ട് ഗുണം കിട്ടുന്ന, പ്രാദേശിക ജീവിതങ്ങളെയും പ്രാദേശിക സാമ്പത്തിക ഘടനയെയും ഗുണപരമായി സ്വാധീനിക്കുന്ന സംരംഭങ്ങൾ വളരേണ്ട ആവശ്യകതയും മലബാർ ബിസിനസ് ക്ളബ് അംഗങ്ങൾ ചൂണ്ടിക്കാട്ടി.
വിവിധ രാജ്യങ്ങളിൽ ഉണ്ടാകുന്ന പ്രതിസന്ധികളും നിയമപരമായ മാറ്റങ്ങളും നേരിട്ട് സ്വാധീനിക്കുന്ന സംരംഭങ്ങൾ കോവിഡ് കാലത്ത് വരുത്തിവച്ച വിനകളും ബുദ്ധിമുട്ടുകളും യോഗത്തിൽ ചർച്ച ചെയ്തു. ചെലവ് ചുരുക്കി ജീവിക്കാനും ചില ജീവിത മൂല്യങ്ങൾ തിരിച്ചുപിടിക്കാനും ഭക്ഷണരീതിയിലെ നല്ല മാറ്റങ്ങളും കോവിഡ് കാലം ദുരിതത്തിനൊപ്പം നൽകിയ ഗുണങ്ങളാണെന്നും അംഗങ്ങൾ അഭിപ്രായപ്പെട്ടു.
ഏതൊരു പ്രതിസന്ധി ഘട്ടത്തിലും ‘പിടിച്ചു നിറുത്താൻ’ സാധിക്കുന്ന, നിസാരമെങ്കിലും തുടർച്ചയായി വളർച്ച പ്രകടിപ്പിക്കുന്ന സംരംഭങ്ങളാണ് ഇനിയുള്ള സമൂഹത്തിന് നല്ലത്. ഇത്തരം സുസ്ഥിര സംരംഭങ്ങളിൽ ലാഭം കുറവായിരിക്കുമെങ്കിലും ദീർഘായുസുണ്ടാകും.
സംരംഭം തുടങ്ങുമ്പോൾ, തൊട്ടടുത്ത നിമിഷത്തിൽ കടന്നുവരാവുന്ന പ്രകൃതി ദുരന്തങ്ങളും, പകർച്ച വ്യാധികളും ഭരണകൂട പോളിസികളും അന്തർദേശീയ ഘടനാ മാറ്റങ്ങളും സംരംഭകർ മുന്നിൽ കാണണം. സംരംഭം എത്ര ചെറുതായാലും അതിന് യോജിക്കുന്ന, ആധുനിക കാലത്തിനൊപ്പം പിടിച്ചു നിൽക്കാവുന്ന പ്രൊഫഷണൽ മികവും സാങ്കേതിക തികവും ഉറപ്പ് വരുത്താനും സംരംഭകർ ശ്രദ്ധിക്കണമെന്നും യോഗം ആവശ്യപ്പെട്ടു.
അംഗങ്ങളുടെ യോഗത്തിൽ കെസി ജുബിഷ്, നൗഷാദ് ടികെ, മുജീബ് റഹ്മാൻ, ഷബീർ കരിമ്പ, നൗഷാദലി ആക്കോടൻ, സുരേഷ്കുമാർ, മിഹ്റാൻ, ഹസീന ഖാദർ, നസീർ ഇളയേടത്ത്, രാഹുൽ വൈമൽ എന്നിവർ സംസാരിച്ചു.
Most Read: പ്രകോപന പ്രസംഗം; ഹിന്ദു ഐക്യവേദി നേതാവ് അറസ്റ്റിൽ
Great article. Really motivates young entrepreneurs. Let the entrepreneurs may focus on hardwork