ഒല്ലൂർ: പുത്തൂർ മേത്തുള്ളിപ്പാടത്തെ ചിങ്ങം ചിപ്സ് എന്ന ചിപ്സ് നിർമാണ സ്ഥാപനം കത്തി നശിച്ചു. ഞായറാഴ്ച രാവിലെ മൂന്ന് മണിയോടെയായിരുന്നു സംഭവം. കോനിക്കര സ്വദേശി തിരുത്തോളി രാജനാണ് സ്ഥാപനത്തിന്റെ ഉടമ.
യൂണിറ്റ് പൂട്ടി തൊഴിലാളികൾ മടങ്ങിയിരുന്നതിനാൽ സംഭവം നടക്കുമ്പോൾ സ്ഥാപനത്തിൽ ആരും തന്നെ ഉണ്ടായിരുന്നില്ല. അയൽവാസികളാണ് തീപിടിത്തമുണ്ടായ വിവരം ഉടമയെ അറിയിച്ചത്. തുടർന്ന് തൃശൂരിൽ നിന്ന് അഗ്നി ശമന സേനയും ഒല്ലൂർ പോലീസും സ്ഥലത്തെത്തിയെങ്കിലും യൂണിറ്റ് പൂർണമായും കത്തി നശിച്ചിരുന്നു. തീപിടുത്തം സംഭവിച്ചതിനെ കുറിച്ച് കൂടുതൽ വിവരങ്ങൾ ലഭ്യമായിട്ടില്ല. ഏകദേശം 20 ലക്ഷം രൂപയുടെ നഷ്ടം സംഭവിച്ചിട്ടുണ്ടെന്ന് സ്ഥാപന ഉടമ പൊലീസിന് മൊഴി നൽകി.